जुरिखेतमा भएको सुमो दुर्घटनामा मृत्यु हुनेको संख्या तीन पुग्यो
मकवानपुरको भीमफेदी गाउँपालिका–६ जुरिखेतमा आइतबार दिउँसो भएको सुमो दुर्घटनामा थप एक जनाको मृत्यु भएको छ । योसंगै दुर्घटनामा मृत्यु हुनेको संख्या ३ पुगेको छ ।
मृत्यु हुनेमा झापा जिल्लाकी २५ वर्षीया महिला देवीकुमारी गिरी रहेको जिल्ला प्रहरी कार्यालय मकवानपुरका प्रवक्ता इन्द्रबहादुर रानाले जानकारी दिए । उनका अनुसार, दुर्घटनामा परी गम्भीर घाइते भएकी ती महिलाको हेटौंडा अस्पतालमा उपचारको क्रममा मृत्यु भएको हो ।
यसअघि दुई जना पुरुषको घटनास्थलमै मृत्यु भएको थियो । उनीहरुको भने सनाखत हुन सकेको छैन । सोही दुर्घटना परी घाइते भएका ५ जनाको हेटौंडा अस्पताल र चुरेहिल अस्पतालमा उपचार भइरहेको जिल्ला प्रहरी कार्यालय मकवानपुरले जनाएको छ ।
दुर्घटनामा घाइते हुनेमा सुमो चालक भीमफेदी गाउँपालिका–४ का विष्णु मगर, रौतहट जिल्ला रंगपुरका २९ वर्षीय सुजन कुमार काफ्ले, हेटौंडा उपमहानगर–३ बसाामाडीकी ३० वर्षीया शर्मिला थिङ, मकवानपुरगढी गाउँपालिका–४ का सोम बहादुर गुरुङ र अन्दाजी ५ वर्षीय नाम नखुलेका एक बालक रहेका छन् ।
आइतबार दिउँसो हेटौंडाबाट काठमाडौंतर्फ जाँदै गरेको ना १ ज ४१०६ नम्बरको सुमो भीमफेदी–६ गढीको सडकबाट करिब डेढ सय मिटर तल सिमखोलामा खसेर दुर्घटना भएको थियो ।
यो पनि पढ्नुहोस्
