भेलमा खसेर ज्यान गुमाएका चालकको परिवारलाई ८ लाख हस्तान्तरण
गत २०७६ साल जेष्ठ २८ गते भक्तपुर नगरपालिका १, चुनदेवीको भेलमा डुबेर ज्यान गुमाएका ट्रक चालकको परिवारलाई नारायणी संघ हेटौंडाले शुक्रबार बीमा वापतको रकम हस्तान्तरण गरेको छ ।
संघका अध्यक्ष हिरालाल श्रेष्ठले हेटौंडा–९ का ट्रक चालक स्वर्गिय नरबहादुर राउतकी श्रीमती रत्नकुमारी राउतलाई सवारी दुर्घटना वापतको रु. ५ लाख र यातायात मजदुर बीमा वापतको रु. ३ लाख गरी ८ लाख रुपैया बराबरको चेक हस्तान्तरण गर्नु भएको हो ।
सल्लाघारीबाट सूर्यविनायक तर्फ मालबाहक ट्रक लिएर आउने क्रममा सो स्थानको सडकमा जम्मा भएको पानीका कारण सडकको चौडाई राम्रोसँग नदेखेपछि ट्रक रोकी चालक राउत बाहिर निस्कने क्रममा कल्भर्टको भेलमा परेर वेपत्ता भएका थिए ।
भेलले बगाएर बेपत्ता भएका ना. ६ ख १६१६ नम्बरको ट्रक चालक बर्ष ५७ का नरबहादुर राउतको शब भोलिपल्ट ललितपुर, बागमती गाउँपालिका वडा नम्बर–१, घुसेलस्थित बागमती खोला किनारमा फेला परेको थियो ।
नारायणी संघ हेटौंडाले हालसम्म संघमा आवद्ध भई दुर्घटनामा परी ज्यान गुमाएका १२ जना सवारी चालकहरुलाई दुर्घटना वापतको रकम हस्तान्तरण गरिसकेको संघका महासचिव सरोजकुमार खनालले जानकारी दिनुभयो ।
महासचिव खनालका अनुसार गत फागुन २१ गते मकवानपुरगढी गाउँपालिका वडा नम्बर–२, शिखरकटेरीमा विवाहको जन्ती लिएर आएको ना. ३ ख ३५५६ नम्बरको बस दुर्घटनामा ज्यान गुमाएका ४ जनालाई पनि जनही ५ लाखका दरले क्षतिपूर्ति रकम प्रदान गरेको छ । सो जन्ती बस दुर्घटनामा घाईते भएकाहरुको उपचारमा १८ लाख रकम खर्च भएको संघका अध्यक्ष हिरालाल श्रेष्ठले बताउनुभयो ।
यो पनि पढ्नुहोस्
