कोरोना अपडेटः विश्वका बिभिन्न मुलुकमा गरिएको लकडाउन खुकुलो पारिँदै 

कोरोना भाइरसका कारण विश्वकै सबैभन्दा बढी प्रभावित बनेको यूरोपका अधिकांश मुलुकमा बन्दाबन्दी खुकुलो बनाउन थालिएको  छ । युरोपका विभिन्न मुलुकहरुमा गरि हालसम्म कोरोना भाइरसका कारण १६ लाखभन्दा बढी संक्रमित भएका छन् भने एक लाखभन्दा बढीको मृत्यु भएको छ ।

युरोपको सबैभन्दा बढी प्रभावित बेलायत, इटली, फ्रान्स, स्पेन लगायतका मुलुकमा बन्दाबन्दी खुकुलो बनाइएको छ । कोरोना भाइरसका कारण प्रभावित मुलुकहरुमा विस्तारै विद्यालय, पार्क, रेस्टुरेन्ट, सिनेमा हल, बजार, किनमेल केन्द्र खोलिएको छ ।

बन्दाबन्दी खुलुकलो बनाइएपनि सबैलाई सावधानी अपनाउन र सामाजीक भौतिक दूरी कायम गर्न निर्देशन जारी गरिएको छ ।

यसैबीच, कोभिड १९ कारण रुसमा गरिएको लकडाउन पनि अब खुकुलो हुँँदै जाने भएको छ । राष्ट्रपति भ्लादिमिर पुटिनले देशव्यापी भएको बन्दाबन्दी सहज हुँदै जाने र व्यवसायहरु सुचारु हुने बताउनुभएको छ, सीआईएनमा खबर छ  ।

लकडाउनले देशको अर्थतन्त्रलाइ असर पारेको भन्दै पुटिनले प्रतिबन्धहरु खुकुलो हुँदै जाने तर प्रभावित क्षेत्रमा भने कडाइ नै रहने बताउनुभयो । रसियामा २ लाख २१ हजारमा कोरोना सङ्क्रमण पुष्टि भएको छ भने एकै दिन ११ हजार ६ सय ५६ नयाँ सङ्क्रमण पुष्टि भएको छ ।  

विश्वभर कोरोना भाइरसका कारण ४२ लाख ५० हजार मानिस सङ्क्रमित भएका छन् । १५ लाख २५ हजार निको भएका छन् भने २ लाख ८६ हजार ९ सय मानिसको मृत्यु भएको छ ।