कोरोनाः उपचारमा खटीनेलाई सुरक्षा सामाग्री उपलब्ध गराउन उच्च अदालत पाटनको आदेश
कोरोना भाइरस रोकथाम, नियन्त्रण तथा उपचारमा खटीने स्वास्थ्यकर्मी, सुरक्षाकर्मी र कर्मचारीहरुलाई आवश्यक सुरक्षा सामाग्री उपलब्ध गराउन उच्च अदालत पाटन हेटौंडा इजलाशले बागमती प्रदेश सरकारका नाममा अन्तरिम आदेश जारी गरेको छ ।
अधिवक्ता ध्रुब प्रसाद चौलागाईले दायर गर्नुभएको रिट निवेदनको सुनुवाई गर्दै उच्च अदालत पाटन हेटौँडा इजलाशले बुधबार प्रदेश सरकारका नाममा अन्तरिम आदेश जारी गरेको हो । न्यायधिश राम प्रसाद अधिकारीको इजलाशले कोरोना नियन्त्रणका लागि आवश्यक पर्ने सम्पूर्ण कार्यहरु अविलम्ब सुरु गर्न प्रदेश सरकारका नाममा अन्तरिम आदेश दिएको हो ।
यस्तै अदालतले विपक्षहरुलाई छलफलका लागि २०७६ चैत्र १९ गते बोलाएको छ, जनपत्रले लेखेको छ । अधिवक्ता चौलागाईले दायर गर्नुभएको रिट निवेदनमा अधिवक्तहरु मन प्रसाद भट्टराइ, सञ्जीब प्रसाद पराजुली र बालकृष्ण अधिकारीले बहस गर्नुभएको थियो ।
बागमती प्रदेशका मुख्यमन्त्री एवम् मन्त्रीपरिषदको कार्यालय, बागमती प्रदेशको सामाजिक विकास मन्त्रालय, बागमती प्रदेशकै आन्तरिक मामीला तथा कानून मन्त्रालय, जिल्ला प्रशासन कार्यालय मकवानपुर र जिल्ला प्रशासन कार्यालय चितवनलाई विपक्षी बनाइ २०७६ चैत्र १० गते रिट निबेदन दर्ता गरिएको थियो ।
अदालतले आदेश जारी गर्नु नपर्ने कारण भए मन्त्रालयहरुका हकमा मुख्य न्यायधिबक्ताको कार्यालय मार्फत र जिल्लाप्रशासन कार्यालयहरुलाई सरकारी वकील कार्यालय मार्फत १५ दिन भित्र लिखीत जवाफ पेश गर्न आदेश दिएको छ ।
यो पनि पढ्नुहोस्
