हिरा लुटपाटमा संलग्न ३ प्रहरी र एक पत्रकार पक्राउ
जिल्ला प्रहरी कार्यालय मकवानपुरले हिरा लुटपाटमा संलग्न ३ प्रहरी र एक पत्रकारलाई पक्राउ गरेको छ ।
पक्राउ पर्नेमा ललितपुर महानगरपालिकाको भैँसेपाटी बस्ने १९ वर्षीय सुजन आचार्य, सुर्खेतको वीरेन्द्रनगर १२ बस्ने २६ वर्षीय सुरेन्द्र बसेल, जाजरकोटको शिवालय २ बस्ने २७ वर्षीय वीरबहादुर बस्नेत र दाङको सिजुवा गाउँपालिका १ बस्ने २८ वर्षीय हिमकान्त पुन मगर रहेका छन् ।
प्रहरीले उनिहरुलाई आज पत्रकार सम्मेलन गरी सार्वजनिक गरेको हो । पक्राउ परेका आचार्य पत्रकार र अन्य संलग्न प्रहरी रहेको मकवानपुरका प्रहरी उपरीक्षक सुशीलसिंह राठौरले पत्रकार सम्मेलनमा जानकारी दिनुभयो ।
मकवानपुरको कैलाश गाउँपालिका वडा नम्बर ५ चौकीटार गोगनेकी धनलक्ष्मी गुरूङको घरमा हिरा खरिद गर्ने बहानामा पुगेका उनीहरूले आइतबार साँझ हिरा लुटपाट गरेका थिए ।
लुटपाटको खबरपछि खटिएको इलाका प्रहरी कार्यालय पालुङको टोलीले उनीहरूलाई पक्राउ गरेको सम्मेलन मार्फत जानकारी दिइएको छ ।
प्रहरीले उनीहरूको साथबाट हिरा एक थान, पेस्तोल एक थान, सञ्चार सेट ४ थान, क्यामरा १ थान, मेटल डिटेक्टर १ थान, मोबाइल ६ थान र ल्यापटप १ थान बरामद गरेको छ । प्रहरीले लुटपाटमा प्रयोग भएको कार समेत नियन्त्रणमा लिएको छ ।
उनीहरूविरुद्ध चोरी तथा डाका मुद्दा अन्तर्गत अनुसन्धान अघि बढाइने प्रहरी उपरीक्षक राठौरले जानकारी दिनुभयो ।
यो पनि पढ्नुहोस्
