निर्भया बलात्कार काण्डका चारै दोषीलाई फाँसी दिइयो
सन् २०१२ डिसेम्बर १६ मा भएको निर्भया सामूहिक बलात्कार काण्डका चारै जना दोषीलाई शुक्रबार बिहान भारत सरकारले मृत्युदण्ड दिएको छ ।
दोषीहरु अक्षयकुमार सिंह, पवन गुप्ता, विनय शर्मा र मुकेश सिंहलाई आज बिहान साँढे ५ बजे दिल्लीको तिहाड जेलमा फाँसी दिइएको हो । चारै जनालाई दुई ओटा लिभर बनाई एकैसाथ मृत्युदण्ड दिइएको जेलका अधिकारीलाई उद्यृत गर्दै भारतीय सञ्चारमाध्यमले जनाएका छन् ।
निर्भयाको २९ डिसेम्बर २०१२ मा उपचारको क्रममा सिंगापुरमा मृत्यु भएको थियो । सात वर्ष तीन महिना चार दिनमा निर्भयाले न्याय पाएकी हुन् ।
दोषीलाई मृत्युदण्ड भएपछि निर्भयाकी आमाले न्यायको जित भएको प्रतिक्रिया दिएकी छिन् । दोषीहरुले मृत्युदण्ड पाइसकेपछि निर्भयाका बुवाले भने,-‘देशमा महिलाहरुका लागि यस्तो कानुन बनोस् कि जसमा मानिसहरुले लामो समयसम्म पर्खन नपरोस् ।’
यसअघि पटक पटक मृत्युदण्डको मिति सारिँदै आएको थियो । सन् २०१२ डिसेम्बर १६ मा रातको समयमा दिल्लीमा २३ वर्षीया मेडिकल छात्रा निर्भयालाई गुडिरहेको बसमा ६ जनाले सामूहिक बलत्कार गरेका थिए ।
चार जना दोषीको अलावा एक प्रमुख आरोपी राम सिंहले तिहाड जेलमा आत्महत्या गरेका थिए । एक जना अपराधी, जो घटना हँदाको समयमा नाबालिग साबित भएका थिए, उनलाई सुधारगृह पठाइएको थियो ।
यो पनि पढ्नुहोस्
