अख्तियारले नेकपाका नेता जोगाएको भन्दै कांग्रेसका भातृ संगठन आन्दोलित
अख्तियार दुरुपयोग अनुसन्धान आयोगले राजनीतिक प्रतिशोध र बदनियतपूर्ण ढंगले नेकपाका नेतालाई जोगाएको भन्दै नेपाली कांग्रेसको भातृ संगठन तरुण दल लगायतले आज बागमती प्रदेशको राजधानी हेटौडामा विरोध प्रदर्शन तथा राजमार्ग अबरोध गरेका छन् ।
अख्तियारले आफ्ना नेतालाई भ्रष्टाचार मुद्दा लगाएको तर नेकपाका नेतालाई जोगाएको भन्दै नेपाल तरुण दलको संयोजनमा कांग्रेसका भातृ संगठनहरु नेविसंघ, महिला संघ लगायतले संयुक्त रुपमा विरोध जनाएका हुन् ।
पार्टी कार्यालयबाट सुरु भएको प्रदर्शन राप्ती पुलमा पुगेर २१ मिनेटसम्म पूर्वपश्चिम राजमार्ग अवरोध गरी कोणसभा आयोजना गरिएको थियो ।
अख्तियारले ललिता निवास जग्गा प्रकरणमा कांग्रेसका उपसभापति विजयकुमार गच्छदार लगायत १ सय ७५ जनामाथि मुद्दा चलाएको तर सोही प्रकरणमा मुछिएका नेकपाका महासचिव विष्णु पौडेल लगायतलाई कारवाहीको दायरामा नल्याएको भन्दै विरोध प्रदर्शन भएको हो ।
घटनाको विरोधमा केही दिनयता कांग्रेसले विभिन्न आन्दोलन गर्दै आएको छ । विरोध प्रदर्शन तथा राजमार्ग अबरोध कार्यक्रममा पार्टीका जिल्ला तहका नेता कार्यकर्ता तथा भातृ एवं शुभेच्छुक संघसंस्थाहरुको पदाधिकारी एवं सदस्यहरुको उपस्थिति रहेको थियो
यो पनि पढ्नुहोस्
