सहकारीमा नलागेको व्यक्तिलाई टिकट दिन हुन्नः कांग्रेसका प्रमुख सचेतक खाँड 

नेपाली कांग्रेसका केन्द्रीय सदस्य तथा प्रमुख सचेतक बालकृष्ण खाँडले सहकारीमा नलागेको व्यक्तिलाई काङ्ग्रेसले टिकट दिन नहुने धारणा राख्नु भएको छ ।

दिव्यतारा बहुउद्देश्यीय सहकारी संस्थाको २२ औं स्थापना दिवस तथा रेडियो मकवानपुरको १० औं वार्षिकोत्सवको अवसरमा आज हेटौडामा आयोजित सामुदायिक सम्मान तथा पुरस्कार वितरण कार्यक्रममा उहाँले यस्तो बताउनु भएको हो ।

नेता खाँडले राज्य व्यवस्था सञ्चालनमा सहकारीको ठुलो योगदान रहेको बताउनु भएको छ । नेपालमा ३३ हजार भन्दा बढि सहकारी रहेको र ६५ लाख शेयर सदस्य रहेको भन्दै उहाँले नेपाल अहिले सहकारीमय भएको बताउनुभयो ।

उहाँले सहकारी ऐन २०७४ र नियमावली समेत आइरहेकोले अब संख्यात्मक भन्दा पनि गुणात्मक सहकारी सञ्चालनमा जोड दिनुपर्ने बताउनुभयो ।  

पुरस्कार वितरण तथा सम्मान
सहकारीको स्थापना दिवस तथा रेडियोको बार्षिकोत्सवको अवसरमा करिब दुई दशकदेखि दारी कपाल काट्ने पेशा गर्दै आएका हेटौंडा–७ का किरण अधिकारी र लामो समयदेखि कृषि पेशा गर्दै आएकी मनहरी गाउँपालिका––६ सुनाचुरीका फूलमाया तामाङलाई सामुदायिक सम्मान–२०७६ प्रदान गरिएको छ ।

रेडियो मकवानपुरले स्थापनाकालदेखि नै बार्षिकोत्सवको अवसरमा प्रदान गर्दै आएको सामुदायिक सम्मान अधिकारी र तामाङलाई प्रदान गरिएको हो । दुवैजनालाई नगद १० हजार राशीसहित दोसल्ला र सम्मान पत्र प्रदान गरिएको थियो ।

यस्तै यस्तै उत्कृष्ट कर्मचारीको रुपमा रेडियो मकवानपुरकी बजार व्यवस्थापक तथा कार्यक्रम प्रश्तोता शान्ति सुनारलाई सम्मान गरिएको थियो । उनलाई नगद ७ हजारसहित सम्मानपत्र प्रदान गरिएको हो ।