गाँजा तस्करीमा ए्रम्बुलेन्सको प्रयोग, ३० किलो गाँजा सहित तीन जना पक्राउ
जिल्ला प्रहरी कार्यालय मकवानपुरले लागुऔषध गाँजा तस्करीमा प्रयोग भएको एम्बुलेन्स सहित नियन्त्रणमा दिइएका तीन जनालाई आज सार्वजनिक गरेको छ ।
आज जिप्रकामा आयोेजित पत्रकार सम्मेलनमा उनिहरुलाई सार्वजनिक गरिएको हो । पक्राउ पर्नेमा एम्बुलेन्स चालक रौतहट डुमरिया नगरपालिका वडा नम्बर ९ का ३९ वर्षका महमद खलिद, डुमरिया–४ का १९ वर्षका अशोक कुमार र भारत विहार मोतिहारी बसन्तपुरका २२ वर्षका विनोद सहनी रहेका छन् ।
मनहरीबाट हेटौँडा बजार आउँदै गरेको डुमरिया स्वास्थ्य चौकीको बा २ झ १७४९ नम्बरको एम्बुलेन्स विशेष सूचनाको आधारमा नेवारपानीमा जाँच गर्दा ३ वटा झोलामा ६ वटा पोका बनाई ल्याएको ३० किलो ६ सय ग्राम लागुऔषध गाँजा बरामद भएको जिल्ला प्रहरी कार्यालय मकवानपुरका एसपी सुशिल सिंह राठोरले जानकारी दिनुभयो ।
साथै प्रहरीले उनिहरुबाट ९१ हजार रुपैँया र २ हजार २ सय भारतीय रुपैँया समेत बरामद गरेको एसपी राठौरले पत्रकार सम्मेलनमा जानकारी दिनुभयो । उनीहरुलाई लागुऔषध नियन्त्रण ऐन अन्तरगत कारवाही अघि बढाइने छ ।
ऐन अनुसार २ बर्षदेखि १० बर्षसम्म कैद र १५ हजारदेखि १ लाख रुपैँया जरिवाना तथा सवारी साधन जफत हुने कानूनी प्रावधान छ ।
यो पनि पढ्नुहोस्
