सहीद स्मारक ए डिभिजन लिग फुटबलमा आज दुई खेल हुँदै

सहीद स्मारक ए डिभिजन लिग फुटबलमा आज दुई खेल हुँदैछन् ।

आजको पहिलो खेलमा अंक तालिकको पाचौं स्थानमा रहेको थ्री स्टार र हिमालयन शेर्पा क्लब बीच प्रतिष्पर्धा हुनेछ । मध्यान्ह १२ बजे यी दुई भिड्नेछन् ।

७ खेल खेलेको थ्री स्टार क्लबले ३ जित २ हार र २ बराबरी खेल्दै ११ अंक जोडेको छ। आजको खेलमा जित निकाल्न सकेको खण्डमा थ्री स्टार तेस्रो स्थानमा उक्लने छ। थ्री स्टार भन्दा अगाडि शीर्ष दुई मछिन्द्र क्लब र त्रिभुवन आर्मी क्लबको १६ अंक छ भने तेस्रो स्थानमा रहेको मनाङ मर्स्याङदी क्लबको १३ अंक र एनआरटीको ११ अंक छ।

अर्कोतर्फ पछिल्लो खेलमा हेवि वेट मछिन्द्र क्लबलाई २९० ले हराएको हिमालयन शेर्पाक्लब फेरि पनि त्यस्तै नतिजाको पर्खाइमा छ। शेर्पाले ७ खेल खेलेर १ जित ४ बराबरी र २ हार ब्यहोर्दै ७ अंक जोडेर तालिकाको ११ औं स्थानमा छ। आजको खेल जितेको खण्डमा शेर्पा क्लब तालिकाको सातौं स्थानमा उक्लने छ।

आजै हुने दोस्रो खेलमा विभागिय टोली एपिएफले जावलखेल युथ क्लबको सामना गर्नेछ। एपिएफ र जावलाखेलबीचको खेल दिउसो ३ बजे शुरु हुनेछ।

यी दुई टिमलाई आजको खेलले फरक अर्थ राख्छ। एपिएफका लागि आजको खेल रेलिगेसन जोनबाट माथि उठ्ने अवसर हुन सक्छ भने जावलाखेलका लागि शीर्ष ४ मा पुग्ने अवसर।

जारी सिजन ७ खेल खेलेर १ जित २ बराबरी र ४ हार ब्यहोरेको एपिएफ ५ अंकसहित अंकतालिकाको १३ औं स्थानमा छ। आजको खेलमा जित निकालेको खण्डमा उसको नवौं स्थानसम्म उक्लने सम्भावना रहन्छ। अर्थात रेलिगेसनको डरबाट राहत मिल्नेछ।

अर्को तर्फ ७ खेलमा २ जित ३ बराबरी र २ हार ब्यहोर्दै ९ अंक जोडेको जावलाखेल आजको खेलमा जित निकाल्दै शीर्ष टिमहरुसँग अंकदुरी घटाउन चाहन्छ।

आजको जितले उसलाई तालिकाको चौथो स्थानमा पुर्‍याउन सक्छ। यसो भएको खण्डमा जावलाखेल शीर्षस्थानको त्रिभुवन आर्मी क्लब भन्दा ४ अंकले मात्र पछाडि रहने छ। आजका दुवै खेल त्रिपुरेश्वरस्थित दशरथ रंगशालामा हुनेछन्।