लागुऔषध तथा सेवन गर्न प्रयोग हुने सामानसहित ७ जना पक्राउ

मकवानपुर प्रहरीले लागुऔषध तथा सेवन गर्न प्रयोग हुने सामानसहित ७ जनालाई पक्राउ गरी आज सार्वजनिक गरेको छ ।

शुक्रबार साँझ हेटौँडा–९ शान्तिटोलस्थित सुरेश त्रिपाठीको घरमा शंका लागि जाँच गर्दा लागुऔषध र सामानसहित ५ जना किशोर र २ किशोरी पक्राउ परेका हुन् ।

इलाका प्रहरी कार्यालयको टोलीले उनीहरुको साथबाट लागु औषध गाँजा ५७० ग्राम, लागु औषध गाँजाको धुलो ८० ग्राम, बाँसमा कालो टेपले बेरेको चिमनी १ थान, माटोको चिमनी १ थान, लाईटर १ थान, मूर्तिजस्तो देखिने चिमनी १ थान, ग्याँस रिफिल ३०० एमएलको १ थान, २ वटा स्कुटर र एउटा मोटरसाइकल बरामद गरेो हो ।

पक्राउ परेकाहरुलाई जिल्ला प्रहरी कार्यालयमा राखेर थप अनुसन्धान भईरहेको आज आयोजित पत्रकार सम्मेलनमा जानकारी दिइएको हो । पछिल्लो समय मकवानपुरका विभिन्न विद्यालय र प्लस टु पढ्दै गरेका युवाहरु लागुऔषधको लतमा फस्न थालेको देखिएको छ ।

क्याम्पस जाने भन्दै जंगलमा जाने, क्याम्पसका शौचालयमा गएर समेत गाँजा खाने गरेको पाइएको छ । अभिभावक र शिक्षकका आँखा छल्दै उनीहरु गाँजाको लतमा फस्न थालेको जिल्ला प्रहरी कार्यालय मकवापनुरले जनाएको छ ।