१२ बर्षे जनयुद्दमा मकवानपुरबाट वेपत्ता भएका व्यक्तिहरुको २५ वटा मात्रै उजुरी 

बेपत्ता पारिएका व्यक्तिको छानविन आयोगले १२ बर्षे जनयुद्दका समयमा मकवानपुर जिल्लाबाट वेपत्ता भएका व्यक्तिहरुको २५ वटा उजुरी परेको जनाएको छ ।

जिल्ला अदालत मकवानपुरमा सरोकारवाला निकायहरुसंग गरिएको अन्तरक्रियामा यस्तो जानकारी दिइएको हो ।

कार्यक्रममा मकवानपुरबाट प्राप्त भएका २५ उजुरी विस्तृत छानविनमा र २ वटा उजुरी तामेलीमा रहेको जनाईएको छ ।

त्यस्तै रेडक्रस सोसाईटी मकवानपुरले मकवानपुरबाट ९ जना बेपत्ता पारिएको तथ्यांक रहेको जनाएको छ भने ईन्सेक परियोजना मकवानपुरले १२ जना बेपत्ता भएको जनाएको छ ।

यसैगरी, ३ वटा उजुरी सत्य निरुपण तथा मेलमिलाप आयोगमा पठाईएकोमा १ वटा उजुरी आयोगबाट फिर्ता भएको समेत जनाईएको छ । २५ वटा उजुरीहरु विस्तृत छानबिनको प्रारम्भिक चरणको कार्य सम्पन्न भएको छ ।

यस्तै, देशभरि परेका उजुरीहरुमध्ये ४ सय १४ उजुरी सत्य निरुपण तथा मेलमिलाप आयोगमा पठाईएकोमा पुनः उजुरी कर्ताको अनुरोध १ सय ३७ उजुरी आयोगले फिर्ता पठाएको छ ।

एउटै व्यक्तिलाई बेपत्ता पारिएको भनि एकभन्दा बढी उपुरी परेकोमा एउटैमा गाभि काटी लगत कट्टा गरिएको उजुरी संख्या १ सय २५ रहेको छ भने तामेलीमा २ सय ८९ उजुरी रहेका छन् ।

त्यसैगरी, विस्तृत छानबिन गर्ने भनि आयोगबाट निर्णय भएका २ हजार ५ सय ६ वटा उजुरी छन् भने उक्त उजुरीहरु हाल कारबाही युक्त रहेका छन् ।

उजुरीका आधारमा बेपत्ता पारिएका व्यक्तिहरुको संख्या २ हजार ५ सय १८ रहेको छ भने विस्तृत छानविन गर्न भनि अनुसन्धान अधिकारी तथा कार्य टोली तोकिएको उजुरी २ हजार १६९ रहेका छन् ।

विस्तृत छानबिनको प्रथम चरणको कार्य सम्पन्न भएको ६४ जिल्ला रहेका छन् भने २३ जना फेला परेका छन् । विस्तृत छानबिन गर्न अनुसन्धान तोकी प्रथम चरण विस्तृत छानविन अन्तर्गत २ हजार ८ वटा उजुरीको कार्य सम्पन्न भएको छ ।

सोही संख्यामा प्रथम चरण विस्तृत छानविन अन्तर्गत उजुरीकर्ता बुझ्ने, एण्टीमोर्टम भराउने, परिपुरण भराउने कार्य सम्पन्न गरि अनुसन्धान अधिकारी तथा कार्य टोलीबाट रायसहितको प्रतिवेदन आयोगमा पेश गरिएको छ ।

यसैगरी, १ सय ६१ वटा उजुरी उजुरीकर्तासँग सम्पर्क नहुँदा विस्तृत छानविनको कार्यअन्तर्गत प्रथम चरणको कार्य गर्न सकिएको छैन । देशभरिबाट बेपत्ता भएका व्यक्तिहरुको ३ हजार १ सय ९७ उजुरी परेको छ ।