२ ओटा लाईसेन्स सहित पक्राउ परेका सञ्जेल सार्वजनिक
जिल्ला प्रहरी कार्यालय मकवानपुरले २ ओटा लाईसेन्स भएका अटो चालकलाई पक्राउ गरी आज सार्वजनिक गरेको छ ।
कार्तिक २५ गते पक्राउ परेका ना २ ह ३६९१ नम्बरको अटोका चालक मकवानपुरगढी गाउँपालिका आमभञ्ज्याङका शिव सञ्जेललाई कार्यलयमा पत्रकार सम्मेलन गरी आज सार्वजनिक गरिएको हो ।
कान्तिलोकपथ अन्तरगत हेटौँडा–५ पिप्लेमा सवारी जाँच गर्दा वडा प्रहरी कार्यालय हेटौँडाका प्रहरी निरीक्षक ईश्वरी प्रसाद भण्डारी नेतृत्वको टोलीले सञ्जेलको साथबाट २ ओटा लाईसेन्स बरामद गरेको थियो ।
२०६८ असोज ५ मा जारी भएको ५–५९५२१ नम्बरको लाइसेन्समा सञ्जेलको ठेगाना निबुवाटार–५, जन्ममिति २०४९ असोज २८ गते र ब्लड ग्रुप ए पोजेटिभ लेखिएके छ ।
यस्तै २०७० असार ४ गते जारी भएको ०५–६२३४२७ नम्बरको अर्को लाईसेन्समा उनको ठेगाना आमभञ्ज्याङ–९, जन्ममिति २०५२ माघ १७ गते र ब्लड ग्रुप ओ पोजेटिभ लेखिएको छ ।
पक्राउ परेका सञ्जेललाई अदालतबाट म्याद लिई अनुसन्धान भइरहेको जिल्ला प्रहरी कार्यालय मकवानपुरका प्रमुख मुकेश कुमार सिंहले जानकारी दिनुभयो । सरकारी छाप दस्तखत किर्ते मुद्धामा ५ वर्षसम्म कैद र ५० हजार रुपैयासम्म जरिवाना हुने प्रावधान रहेको सिंहले बताउनुभयो ।
यो पनि पढ्नुहोस्
