प्रधानमन्त्रीलाई १६ बुँदे माग सहितको ज्ञापन पत्र
निर्माण व्यवसायी संघ मकवानपुरले जिल्ला प्रशासन कार्यालय मार्फत प्रधानमन्त्री तथा मन्त्रीपरिषद्को कार्यालयलाई १६ बुँदे माग सहितको ज्ञापन पत्र बुझाएको छ ।
संघले पटक पटक उठाएका निर्माण उद्योग प्रवद्र्धन गर्ने मागहरुमा कुनै संबोधन नगरिएको भन्दै प्रमुख जिल्ला अधिकारी प्रेमराज जोशी मार्फत प्रधानमन्त्री केपी शर्मा ओलीलाई ज्ञापन पत्र बुझाएको हो ।
सार्वजनिक खरिद क्षेत्रलाई नै धरासायी बनाउने गरि राखिएका प्रावधानहरु तत्काल संशोधन तथा खारेजीको माग गर्दै १६ बुँदे ज्ञापन पत्र बुझाएको हो ।
२०७६ साउन १६ गते बुधबारको नेपाल राजपत्रमा तेश्रोपटक संशोधन गरि प्रकाशित सार्वजनिक खरिद (आठौं संशोधन) नियमावली २०७६ ले म्याद थप र बैंक क्रेडिट लाईनमा नकारात्मक असर हुने प्रकारका प्रावधान राखेकाले अब महासंघको निर्णय अनुसार स्थगित भएको आन्दोलन पुनः सुरु गर्ने संघका अध्यक्ष श्यामकसुन्दर ढकालले जानकारी दिनुभयो ।
ज्ञापनपत्रमा दफा ५५ (३) मा जत्तिसुकै अवधिको जस्तोसुकै निर्माण कार्य खरिदमा पनि मूल्यवृद्धि समायोजन गरि भुक्तानी हुने व्यवस्था हुनुपर्ने, दफा ६३ उपदफा १ मा स्वीकृतिको लागि छनौट भएको बोलपत्रदाता वा प्रस्ताववदाता खरिद सम्झौता गर्न नआएमा धरौटी जफत गरिने व्यवस्था यथावत राखी कालोसुचीमा राख्ने व्यवस्था हटाउनु पर्ने लगायतका मागहरु राखिएको छ ।
संघका महासचिव बालकुमार मल्लले प्रमुख जिल्ला अधिकारी जोशी समक्ष ज्ञापनपत्र पढेर सुनाउनु भएको थियो । पत्र लिए पश्चात प्रमुख जिल्ला अधिकारी जोशीले पत्र प्रधानमन्त्री कार्यालयमा पु¥याउने बचन दिनुभयो ।
यो पनि पढ्नुहोस्
