कांग्रेस सभापति देउवा हेटौँडा आउँदै
नेपाली कांग्रेसका सभापति शेर बहादुर देउवा भोली हेटौँडा आउँदै हुनुहुन्छ ।
पार्टीको महाधिवेशन प्रतिनिधिहरुको भेला तथा प्रशिक्षणको उद्घाटनका लागि सभापति देउवा आउन लाग्नु भएको नेपाली कांग्रेस मकवानपुरले आज पार्टी कार्यालयमा पत्रकार सम्मेलन गरी जानकारी दिएको हो ।
प्रशिक्षण कार्यक्रममा देउवासंगै बरिष्ठ नेता रामचन्द्र पौडेल, उपसभापति विमलेन्द्र निधि, महामन्त्री डा शशांक कोइराला लगायतका नेता हेटौँडा आउने बताइएको छ ।
कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानको आयोजना एवं नेपाली कांग्रेस मकवानपुरको संयोजनमा हुने दुई दिने प्रशिक्षणको सम्पूर्ण तयारी सम्पन्न भइसकेको पत्रकार सम्मेलन गरी जानकारी दिइएको छ ।
महाधिवेशन प्रतिनिधिहरु हेटौंडा आउने क्रम सुरु भइसकेको नेपाली कांग्रेस मकवानपुरले जनाएको छ ।प्रशिक्षणमा प्रदेश तीन अन्तरगत ६ जिल्लाका महाधिवेशन प्रतिनिधि र प्रदेश केन्द्रीय सदस्यहरुको सहभागिता रहने प्रवक्ता प्रदिप कोइरालाले जानकारी दिनुभयो ।
मकवानपुर, चितवन, धादिङ, रसुवा, नुवाकोट र सिन्धुलीका २ सय ९० जना प्रतिनिधिहरुको सहभागिता रहने जनाईएको छ । सहभागीलाई प्रतिष्ठानका प्रमुख नीधि, प्रतिष्ठानका सदस्य एवं राष्ट्रिय योजना अयोगका पूर्व उपाध्यक्षहरु डा गोविन्द पोखरेल, डा जगदिशचन्द्र पोखरेल, प्रशिक्षण विभागका कार्यकारी निर्देशक पुरुषोतम दाहाल, प्रतिष्ठानका सदस्यहरु डा आरजु देउवा, खिला दाहाल र राजु नेपालले सहजिकरण गर्ने पत्रकार सम्मेलनमा जानकारी दिइएको छ ।
पत्रकार सम्मेलनमा नेपाली कांग्रेस प्रदेश तीन संसदीय दलका नेता एवं मकवानपुरका सभापति इन्द्र बहादुर बानियाँ, पूर्व उपभासपति अशोक शाक्य, सहसचिव रामबाबु बानियाँ, कोषाध्यक्ष गोपिलाल विक लगायतको आतिथ्यता रहेको थियो ।
यो पनि पढ्नुहोस्
