नागरिकको अधिकारका सवालमा समन्वय जरुरी
नागरिकको अधिकारका सवालमा आवाज उठाउने संस्थाहरु तथा संचारकर्मीहरु बिच नै समन्वय हुन नसक्दा प्रभावकारी रुपमा परिणाम आउन नसकेको एक कार्यक्रममा सहभागीहरुले बताएका छन् ।
इन्सेक नेपालले आयोजना हेटौंडामा आयोजना गरेको 'विकासका लागि नागरिक समाज तथा सञ्चारजगत बिच सहकार्य' बिषयक अन्तरक्रियामा सहभागीहरुले यस्तो बताएका हुन् ।
नागरिकको अधिकारका सवालमा छुट्टाछुट्टै आवाज उठाउँदै आएकोले प्रभावकारी बन्न नसकेको भन्दै सहभागीहरुले अबका दिनमा सहकार्य गरी अघि बढ्ने प्रतिबद्धता व्यक्त गरेका छन् ।
कार्यक्रममा नेपाल पत्रकार महासंघ मकवानपुरकी उपाध्यक्ष सरीता दाहालले संचारकर्मीहरुले उठान गरेका बिषयहरु नागरिक समाजका व्यक्तिहरुले पनि संगै उठान गरे सम्बन्धित निकायको ध्यान जाने र समाधानको लागि पहल हुने सझाव दिनुभयो ।
उहाँले नागरिकको खाद्य सुरक्षा, स्वास्थ, शिक्षा लगायतका क्षेत्रमा सञ्चारकर्मीहरुले कलम चलाए पनि नागरिक समाजका अगुवा संस्थाहरुले चासोका साथ नलिँदा सम्बन्धित निकायको ध्यान पुग्न नसकेको गुनासो समेत गर्नुभयो ।
यस्तै कार्यक्रममा कोक्याप नेपालका उपाध्यक्ष दिपेन्द्र ढकालले भौतिक विकाससंगै अब नागरिकको स्वास्थ, शिक्षा र खाद्य अधिकारको सुनिश्चितताको विकासलाई पनि अनिवार्य रुपले हेरिनु पर्ने धारणा राख्नुभयो ।
उहाँले यस्ता बिषयहरुमा नागरिक समाज र सञ्चारकर्मी बिच समन्वय गरी अघि बढ्न आग्रह गर्नुभयो ।
यस्तै कार्यक्रममा नागरिक समाज मञ्चकी संयोजक रमिला सापकोटाले जबसम्म शिक्षा, स्वास्थ र खाद्य सुरक्षाको बिषयमा आम नागरिकले पूर्णता प्राप्त गर्न सक्दैन तबसम्म समाजमा भएका भौतिक विकासको अर्थ नरहने बताउनुभयो ।
उहाँले समाजमा जतिसुकै भौतिक विकास भएपनि आम मानिसको विकासका लागि शिक्षा, स्वास्थ र खाद्य सुरक्षा र अधिकार प्रत्याभूत हुनुपर्नेमा जोड दिनुभयो ।
इन्सेक नेपाल मकवानपुरका जिल्ला प्रतिनिधी पुष्पराज अधिकारीको अध्यक्षतामा भएको कार्यक्रममा नागरिक समाजका प्रतिनिधी र सञ्चारकर्मीहरुको सहभागीता रहेको थियो ।
यो पनि पढ्नुहोस्
