आईसीसी विश्वकप क्रिकेटः श्रीलंकासंग हारेसंगै इंग्ल्याण्डको शीर्ष स्थानमा उक्लने मौका गुम्यो
१२ औं संस्करणको आईसीसी विश्वकप क्रिकेटमा आयोजक तथा उपाधि दाबेदार इंग्ल्याण्डलाई श्रीलंकाले पराजित २० रनले गरेको छ ।
लिड्समा भएको खेलमा श्रीलंकाले दिएको २ सय ३३ रनको सामान्य लक्ष्य पछ्याएको घरेलु टोली इंग्ल्याण्ड ४७ ओभरमा मात्र २ सय १२ रन जोड्दा अलआउट भयो ।
इंग्ल्याण्डका लागि बेन स्टोक्सले अविजित ८२ रनको अर्धशतकीय इनिङ्स खेले पनि टोलीलाई जित दिलाउन सकेनन् । जोय रुटले ५७ रनको अर्धशतकीय इनिङ्स खेले ।
यसअघि टस जितेर पहिले ब्याटिङ गरेको श्रीलंकाले निर्धारित ५० ओभरमा ९ विकेट गुमाएर २ सय ३२ बनाएको थियो । श्रीलंकाका एन्जेलो म्याथ्युजले अविजित रहदै सर्वाधिक ८५ रनको अर्धशतकीय इनिङस खेले । यो हारसंगै इंग्ल्याण्डले शीर्ष स्थानमा उक्लने मौका गुमाएको छ ।
इंग्ल्याण्डले ६ खेलबाट ८ अंक जोडेको छ । प्रतियोगितामा दोस्रो हार व्यहोरेको इंग्ल्याण्ड तेस्रो स्थानमा छ । इंग्ल्याण्डलाई हराएसंगै श्रीलंकाले शीर्ष चारमा पुग्ने सम्भावना कायम राखेको छ ।
श्रीलंकाले ६ खेलबाट ६ अंक जोडेको छ र तालिकाको पाँचौ स्थानमा उक्लिएको छ । विश्वकपमा आज २ खेल हुँदैछन् ।
यो पनि पढ्नुहोस्
