भारतमा फोनी आँधीको हल्चल, तटीय क्षेत्रका ११ लाख मानिस सुरक्षित स्थानमा सारियो
बंगालको खाडीमा बनेको फोनी आँधी केही घण्टा मै भारतको ओडिशा राज्यको तटीय क्षेत्र पुरीमा आइपुग्दै छ । फोनी आँधीका कारण त्यस क्षेत्रमा वर्षा भइरहेको छ ।
फोनीले त्यस क्षेत्रमा डूलो विपत ल्याउन सक्ने भन्दै तटीय क्षेत्रका झण्डै ११ लाख मानिसलाई सुरक्षित स्थानमा सारिएको भारतीय सञ्चार माध्यमहरुले जनाएका छन् ।
जल सेना र कोस्ट गार्डलाई सम्भावित घटनालाई कम गर्न अलर्ट राखिएको बीबीसीले जनाएको छ । मौसम विभागका अनुसार यो प्रणाली ओड़ीसा को तटीय क्षेत्रमा भित्रिने र त्यहा भू–स्खलनको सम्भावना छ । त्यसपछि यो प्रणाली फेरि उत्तर–पूर्व दिशातर्फ जाने क्रममा कमजोर बन्दै जाने छ ।
मौसम विभागका अनुसार फोनीको गति १७५ देखि २०० किलोमिटर प्रतिघण्टासम्म हुनेछ । यसका कारण समुद्रमा झण्डै डेढ मिटरसम्म छाल आउन सक्ने अनुमान गरिएको छ ।
पुरीको तटीय क्षेत्रमा ठोक्किएपछि यो आँधी ओडिशाकै खुर्दा, कटक, जगतसिंहपुर, केन्द्रपाडा, जाजपुर, भद्रक, बालेश्वर जिल्ला हुँदै पश्चिम बंगालतर्फ बढ्नेछ । त्यसपछि यसले बंगलादेशका केही भागमा समेत प्रभाव पार्नेछ ।
ओडिशामा सम्भावित खतरालाई मध्यनजर गर्दै एक सयभन्दा बढी रेल रद्द गरिएको छ । भने गएरातिदेखि नै भुवनेश्वर विमानस्थलबाट २४ घण्टाका लागि सबै उडान रद्द गरिएको छ ।
ओडिशा सरकारले उद्धार तथा राहतका लागि पूर्व तयारी गरिसकेको बताएको छ ।
यसको प्रभाव नेपालको हिमाली भेगमा समेत पर्ने नेपाली मौसमविदहरुले जनाएका छन् । मौसमविदहरुका अनुसार जमिनको सम्पर्कमा आएपछि यो चक्रवातको तीव्रता कम हुनेछ ।
यो पनि पढ्नुहोस्
