नेल्टाको राष्ट्रिय सम्मेलन फागुन १८ र १९ गते हेटौंडामा हुने
नेपाल इङ्ग्लिस ल्याङ्ग्वेज टिचर्स एशोसियसन (नेल्टा) को राष्ट्रिय सम्मेलन हेटौंडामा हुने भएको छ । नेल्टाको तीन नंमबर प्रदेश समितिले आज हेटौंडामा पत्रकार सम्मेलन गरि यही फागुन १८ र १९ गते हेटौंडामा सम्मेलन आयोजना गरिने जानकारी दिएको हो ।
देशका ५५ जिल्लाका अग्रेजी बिषय अध्यापन गराउने शिक्षकहरुलाई जम्मा गरेर यो कार्यक्रम गर्न लागिएको नेल्टा तीन नंम्बर प्रदेशका अध्यक्ष गणेश प्रसाद हुमागाईले बताउनुभयो । नेल्टा केन्द्रले प्रत्येक वर्ष काठमाण्डौमा अंग्रेजी भाषा शिक्षकहरुको ३ दिने अन्तर्राष्ट्रिय सम्मेलन आयोजना गर्ने गरेको छ ।
यसपटक काठमाण्डौमा नभई नेल्टा प्रादेशिक समिति प्रदेश नंं. ३ को आयोजनामा २ दिने राष्ट्रिय सम्मेलनको आयोजना हेटौंडामा गर्न लागिएको हो । सम्मेलनमा १० भन्दा बढी राष्ट्रका विभिन्न तहमा अध्यापन गर्ने शिक्षक, प्राध्यापक, प्रशिक्षक, लेखक, पाठ्यक्रम निर्माता तथा अंग्रेजी भाषा विशेषज्ञहरुको उपस्थिति हुने अध्यक्ष हुमागाईले बताउनुभयो ।
सम्मेलनको सबैजसो तयारी भईसकेको उहाँको भनाई छ । सम्मेलनमा देशका ७ प्रदेश अन्तर्गत रहेका करीव ५५ जिल्लाका विभिन्न भागबाट प्राथमिक देखि विश्वविद्यालय तहमा अध्यापन गर्ने शिक्षक तथा प्राध्यापक, अंग्रेजी भाषा विशेषज्ञ, प्रशिक्षक, लेखक, पाठ्यक्रम निर्माता र अंग्रेजी अध्ययन गर्ने विद्यार्थीहरु गरी ७ सय जना भन्दा बढीकोे सहभागिता हुने अपेक्षा गरिएको उहाँले बताउनुभयो ।
अंग्रेजी भाषा शिक्षण सम्बन्धी राष्ट्रिय तथा अन्तर्राष्ट्रिय तहमा अवलम्बन गरिएका नविनतम ज्ञान, सीप, प्रविधि सम्बन्धी अनुभव साटासाट गर्न उपयुक्त मञ्च प्रदान गरी अंग्रेजी भाषा शिक्षणको गुणस्तरमा बृद्धि गर्नु यस सम्मेलनको उद्देश्य रहेको छ ।
अंग्रेजी शिक्षण पद्धतिमा प्रयोग भइरहेका विधिहरुको रुपान्तरणले एक्काइसौं शताब्दीका कक्षाकोठाका आवश्यकताको पूर्ति कसरी गर्दछ भन्ने मुख्य विषयवस्तुका बारेमा २ मुख्य वक्ताहरुले भनाइ राख्नुहुने कार्यक्रम तय भएको नेल्टाका प्रदेश ३ का महासचिब किशोर पराजुलीले बताउनुभयो ।
वर्तमान अवस्थामा अंग्रेजी शिक्षणका विभिन्न जल्दाबल्दा मुद्धाको बारेमा बृहद छलफल गरिने उहाँले बताउनुभयो । विशेषगरि एक्काइसौ शताब्दीमा प्रविधि बीच हुर्किरहेका हाम्रा बालबालिकाहरुलाई सिकाइ प्रक्रियामा सहभागी गराई प्रभावकारी ढंगले शिक्षण गराउन आवश्यक शिक्षण विधिहरुको कार्यशालामा विमर्श हुनेछ ।
अंग्रेजी शिक्षकहरुको यस राष्ट्रिय सम्मेलनका मुख्य वक्ताहरु एक दर्जन भन्दा बढी रहेका छन् । मुख्य वक्ताहरु बाहेक सम्मेलनमा राष्ट्रिय, अन्तर्राष्ट्रिय तहका अंग्रेजी भाषा विशेषज्ञहरुद्वारा भाषा शिक्षण सम्बन्धी १ सय ७५ भन्दा बढी विशेषज्ञहरुबाट कार्यपत्र तथा कार्यशाला प्रस्तुतिकरण गरिनेछ अध्यक्ष हुमागाईले बताउनुभयो ।
यो राष्ट्रिय सम्मेलनले समग्र जिल्लाकै शैक्षिक वातावरणलाई सकारात्मक रूपमा प्रभावित पार्ने र विशेषगरी यस जिल्लाका अंग्रेजी भाषा शिक्षकहरूको लागि बढी महत्वपूर्ण हुने अपेक्षा गरेको नेल्टा मकवानपुरका अध्यक्ष संगम चौलागाईले बताउनुभयो ।
यो पनि पढ्नुहोस्
