प्रथम बकैया गाउँपालिका स्तरीय रनिङ शिल्ड फुटबलमा बकैया चार ५–० गोल अन्तरले विजयी
पुर्वी मकवानपुरको बकैया गाउँपालिकामा जारी प्रथम बकैया गाउँपालिका स्तरीय रनिङ शिल्ड फुटबल प्रतियोगितामा वडा नम्बर ४ ले जितेको छ ।
बकैया ४ ले बकैया १ लाई ५–० को फराकिलो गोल अन्तरले पराजित गरेको हो । बकैया ४ लाई जीत दिलाउन अनिल माझीले ह्याट्रिक गरे ।
अनिलले खेलको ५८ र ५९ मिनेटमा लगातार गोल गर्दै आफ्नो ह्याट्रिक पुरा गरे र बकैया ४ लाई समग्रमा ५–० को जित दिलाए । ह्याट्रिक गर्ने अनिल खेलको म्यान अफ द म्याच समेत भए । योसंगै प्रतियोगिताको क्वाटरफाईनल पुग्ने टिमको टुंगो लागेको छ ।
भोली हुने पहिलो क्वाटरफाईनलमा वडा नम्बर १० ले वडा नम्बर ८ तथा दोश्रो खेलमा वडा नम्बर ११ ले वडा नम्बर ३ को सामना गर्ने आयोजक बकैया गाउँपालिका खेलकुद विकास समन्वय समितिका सचिव यादब चौँलागाईले जानकारी दिनुभयो ।
प्रतियोगितामा बकैया गाउँपालिकाका १२ वडाहरुको सहभागिता रहेको छ ।
प्रतियोगिताको विजेताले नगद ७५ हजार, शिल्ड, मेडल तथा प्रमाणपत्र, उपविजेताले नगद ५० हजार सहित शिल्ड, मेडल तथा प्रमाणपत्र र तृतिय हुनेले नगद २५ हजार सहित शिल्ड, मेडल तथा प्रमाणपत्र प्राप्त गर्ने सचिव चौँलागाईले बताउनुभयो ।
यो पनि पढ्नुहोस्
