एएफसी एसियन कप छनोटमा मंगलबार नेपाल र यमन भिड्ने

एएफसी एसियन कप छनोट प्रतियोगिता अन्तर्गत मंगलबार नेपाल र यमन बीच प्रतिस्पर्धा हुँदैछ ।
कतारको दोहामा रहेको सुहेम बिन हमाद रंगशालामा हुने नेपाल र यमनबीचको खेल नेपाली समय अनुसार राति ९ बजे हुनेछ ।

यसअघिका खेलेको पाँच खेलमध्ये तीनमा हार र दुई बराबरी खेलेको नेपालका लागि यो खेल प्रतिष्ठाका लागि मात्र हुनेछ ।
नेपालको छनोट हुने सम्भावना सकिएको छ । तर यमनका लागि यो खेल निकै महत्वपूर्ण छ । समूह एफमा एक जित र चार बराबरीसँगै सात अंक बनाएको यमनले नेपाललाई हराएमा सन् २०१९ मा हुने एएफसी एसियन कपमा छनोट हुनेछ ।
विश्व वरियताको १४० औं स्थानमा रहेको यमनलाई नेपालले पहिलो लेगमा गोलरहित बराबरीमा रोकेको थियो । यो खेल हल्चोक मैदानमा भएको थियो ।
यसअघि नेपाल र यमन तीनपटक आमनेसामने भएका छन् । हल्चोक मैदानमा खेल्नुअघि सन् २०१४ मा भएको मैत्रीपूर्ण खेलमा नेपाल यमनसँग २–० ले पराजित भएको थियो । सन् २००० मा एसियन कप छनोटमा नै नेपाल ३–० ले पराजित भएको थियो ।