आईसिसी विश्वकप छनोट प्रतियोगितामा आज नेपाल र नेदरल्याण्ड्सको भिडन्त

आईसिसी विश्वकप छनोट प्रतियोगिताको सातौं स्थानका लागि हुने खेलमा नेपालले आज नेदरल्याण्ड्ससँग प्रतिस्पर्धा गर्दैछ ।
क्रस प्लेअफमा पपुवान्यूगिनीविरुद्ध जित हासिल गरी एकदिवसीय मान्यता सुरक्षित गरेको नेपाल उच्च मनोवलका साथ मैदान उत्रनेछ ।
खेल जिम्बावेको क्वेक्वेस्थित क्वेक्वे स्पोर्टस क्लबको मैदानमा नेपाली समयअनुसार दिउँसो सवा १ बजेदेखि सुरु हुनेछ ।
आजको खेल प्रतिष्ठाको लागि हुनेछ । विश्व क्रिकेट लिग च्याम्पियन नेदरल्याण्ड्सलाई पराजित गर्न सके नेपालले सातौं स्थानमा रहेर प्रतियोगिता टुंग्याउनेछ ।
नेपालले विश्व क्रिकेट लिग लिग च्याम्पियनसिपमा नेदरल्याण्ड्ससँग खेलेका दुई खेलमा एकमा जित र अर्को खेलमा हार ब्यहोरेको छ ।
२०१६ को अगस्ट १३ मा भएको पहिलो खेलमा ७ विकेटले पराजित भएको नेपालले अगष्ट १५ मा भएको दोस्रो खेलमा १९ रनको जित निकालेको थियो ।