फागुन २८ गते ४९ जनाको ज्यान जाने गरी भएको विमान दुर्घटनाप्रति शोक प्रस्ताव पारित

संघिय संसदले फागुन २८ गते भएको विमान दुर्घटनाप्रति शोक प्रस्ताव पारित गरेको छ । आज बसेको प्रतिनिधिसभाको बैठकले त्रिभुवन विमानस्थलमा भएको युएस बंगला एअरलाइन्सको बिमान दुर्घटनाप्रति गहिरो दुख ब्यक्त गर्दै शोक प्रस्ताब पारीत गरेको हो ।
सभामुख कृष्णबहादुर महराले सो प्रस्ताब सर्बसम्मत पारित भएको घोषणा गर्नुभएको थियो । बैठकमा दुर्घटनामा ज्यान गुमाउनेहरुको सम्मानमा एक मिनेट मौनधारण गरिएको थियो ।

बैठकमा बिशेष समय मागेर प्रधानमन्त्री केपी शर्मा ओलीले सरकारका तर्फबाट दुर्घटना बारे सदनलाई जानकारी गराउनुभएको थियो ।
उहाँले दुर्घटनामा ज्यान गुमाएका ४९ जनामध्ये २२ जना नेपाली, २६ जना बंगलादेशी र १ जना चिनियाँ नागरिक रहेको बताउनुभयो । घाइतेमध्ये १७ जना काठमाडौंको विभिन्न अस्पतालमा उपचार गराइरहेका र ३ जना डिस्चार्ज भएर घर फर्किएको उल्लेख गर्नुभयो ।

प्रधानमन्त्री ओलीले यस्ता अप्रिय घटना हुन नदिन सरकारले छानबीन समिती गठन गरेको र उद्धार र उपचारका लागि सरकारले सबै ब्यबस्था गरेको समेत जानकारी गराउनुभयो ।
विमानमा चालक दलका ४ जनासहित ७१ जना रहेकोमा ३३ जना नेपाली, चालक दलका सदस्यसहित ३६ जना बंगदलादेशी, १ जना चिनियाँ र १ जना माल्दिभ्सका नागरिक थिए ।