एनआरएनएको अध्यक्षमा भवन भट्ट विजयी

गैरआवासीय नेपाली संघ (एनआरएनए) को अध्यक्षमा निवर्तमान उपाध्यक्ष भवन भट्ट विजयी हुनुभएको छ । काठमाडौंमा भएको संघको आठौं विश्वसम्मेलनबाट अध्यक्षकी प्रत्यासी जमुना गुरुङलाई पराजित गर्दै भट्ट विजयी हुनुभएको हो ।
गोरखामा जन्मिएका नवनिर्वाचित अध्यक्ष भट्ट जापानमा व्यवसायमा संलग्न हुनुहुन्छ । उहाँले जापानमा दुई सय ९० वटा रेस्टुरेन्ट चलाउँदै आउनुभएको छ ।
सोमबार राति सम्पन्न मतगणनामा भट्टले एक हजार एक सय ९७ मत प्राप्त गर्नुभयो भने गुरुङले ५ सय ८४ मत प्राप्त गर्नुभयो ।
यसैगरी उपाध्यक्षमा कुमार पन्त र कुल आचार्य निर्वाचित भएका छन् । महिला उपाध्यक्षमा सपिला राजभण्डारी, महासचिवमा बद्री केसी, कोषाध्यक्षमा हिक्मत थापा र सहकोषाध्यक्षमा सोम सापकोटा विजयी भएका छन् ।
सचिवमा डीवी क्षेत्री र जानकी गुरुङ चुनिएका छन् । महिला संयोजकमा रजनि प्रधान र युवा संयोजकमा सुदन थापा विजयी भएका छन् ।
अमेरिका क्षेत्रीय संयोजकमा गौरी जोशी, एशिया प्रशान्त क्षेत्रीय संयोजकमा किरणविक्रम थापा र युरोप क्षेत्रीय संयोजकमा शिव बरुवाल विजयी भएका छन् ।
निर्वाचनमा अधिकांश पद भट्ट प्यानलबाट उम्मेदवार बनेकाहरुले जितेका छन् ।
सम्मेलनमा एक हजार ७ सय ८८ एनआरएन मतदानमा सहभागी भएका थिए । एनआरएनए सम्मेलन गत शनिबार काठमाडौंमा सुरु भएको थियो । तीन दिनसम्म चलेको सम्मेलनले नयाँ नेतृत्व चयन गरेको हो ।