जति जिम्मेवारी बोध र लचकता माओवादीले प्रस्तुत गरेको छ, त्यो सिंगो देशका अगाडिः प्रचण्ड

माओवादी केन्द्रका अध्यक्ष पुष्पकमल दाहाल प्रचण्डले कम्युनिष्टहरुबीचको एकतालाई लिएर कसैले झस्किरहनु पर्ने कारण नभएको बताउनु भएको छ । ।
प्रचण्डले आफूहरु यही संविधान अन्तर्गत रहेर शान्तिपूर्ण तरिकाले अघि बढ्ने बताउनुभयो । कम्युनिष्ट भएको नाताले एउटै केन्द्रको प्रयास गर्नु गलत होइन भन्दै प्रचण्डले ‘नेपाली जनता, सरकार र अन्तर्राष्ट्रिय जगतले समेत यसलाई अतिरन्जित तरिकाले नबुझ्न अनुरोध गर्नुभएको छ ।
प्रचण्डले भन्नुभयो – अहिले वाम एकताको कुरा चलेको छ । मैले त्यसको घोषणा हुनु अघि पनि प्रधानमन्त्रीलाई यो कसैप्रति लक्षित छैन भनेर भनेको हो । अहिले बजारमा आएको चर्चा दुखद छ । कम्युनिष्टको शासन आइहाल्यो भनेर प्रचार गर्नु बिडम्बना हो।
प्रचण्डले अगाडी भन्नुभयो – हामीले यो संसदीय प्रणालीलाई नै स्वीकार गरेका छौं । सामान्य नेताले सक्ने कुरा थिएन– सेना समायोजन र हतियार बुझाउने कुरा । पार्टी विभाजनको जोखिम मोलेर भएपनि यस्तो साहस गर्ने कुरा चानचुने कुरा थिएन । विश्वमा नै यस्तो कहिं देखिन्न । त्यसैले अहिले यही संविधान अन्तर्गत शान्तिपूर्ण रुपमा विचार मिल्ने कम्युनिष्टहरु एक ठाउँ देखिँदा कोही झस्किनुपर्ने कारण छैन । अहिले यो सदनमा समेत जुन विचार व्यक्त भए, त्यसरी डराउनुपर्ने कारण छैन । शान्ति प्रक्रियालाई टुंगोमा पुर्याउन, समृद्धिका लागि सबैसँग एक भएर जानेमा हामी जिम्मेवार रहनेमा कुनै शंका नगर्न अनुरोध छ ।
हामी कम्युनिष्ट भएका नाताले देशलाई सबै कम्युनिष्ट पार्टीलाई एकीकृत गर्ने कुरा स्वभाविक हो । यसलाई राजनीतिक ढंगले हेर्न कांग्रेसका साथीहरुलाई अनुरोध गर्दछु प्रचण्डले भन्नुभयो । यो एकताको कुरा हामीले दश वर्षदेखि मेहनत गरेको हो । अहिले एक कदम अगाडि बढेका छौं । तर यो देशमा राजनीतिक अस्थिरता पैदा गर्ने, सरकार ढाल्ने, अर्को सरकार बनाउने कुरासँग यो सम्बन्धित छैन ।
यो सरकारविरुद्ध परिलक्षित होइन । बरु यो एकता प्रक्रियाले सरकारका विरुद्ध होइन, बरु सरकारलाई जिम्मेवारी भूमिका निर्वाह गरोस् भनेर एकताको सहमतिको घोषणाको बेला भनिएको छ । तर नेपाली कांग्रेस लगायतका शक्तिसँग मिलेर देशको हित हुन्छ, सहकार्य गर्छौं । यो लुकिछिपी, बेइमानी र षडयन्त्रको कुरा होइन । जति जिम्मेवारी बोध र लचकता माओवादीले प्रस्तुत गरेको छ, त्यो सिंगो देशका अगाडि छ ।