पर्साको सखुवा प्रसौनीमा तीर्थयात्री चढेको ट्र्याक्टर दुर्घटना, दुई भारतीय नागरिककको मृत्यु

पर्साको सखुवा प्रसौनीमा गएराति तीर्थयात्री चढेको ट्र्याक्टर दुर्घटना हुँदा दुईजना भारतीय नागरिककको मृत्यु भएको छ । अन्य ७ जना घाइते भएका छन् ।
दुर्घटनामा भारतको मोतिहारी जिल्ला थाना रक्सौल ग्राम पञ्चायत पनटोकाका ५० वर्षीय महेन्द्र पसवान र ९ वर्षकी पूजा कुमारीको मृत्यु भएको प्रहरीले जनाएको छ । उनिहरु दुवैको नारायणी उपक्षेत्रीय अस्पताल वीरगञ्जमा उपचारको क्रममा  मृत्यु भएको हो ।
पर्साको दुग्धेश्वर माहदेव मन्दिरमा लाग्ने सोमबारे मेलामा जल चढाउन जाने क्रममा उनीहरू चढेको ना.५त. ३६३० नम्बरको ट्याक्टर सखुवाप्रसौनी ५ बलुवा र देवारवानाको बीचमा पल्टिएको ईलाका प्रहरी कार्यालय पटेर्वा सुगौलीले जनाएको छ । चालकले अत्याधिक मदिरा सेवन गरी ट्याक्टर चलाउँदा दुर्घटना भएको प्रहरीले जनाएको छ ।