आइसिसी यू–१९ विश्वकप क्रिकेट छनोट प्रतियोगिताको अभ्यास खेलमा नेपाललाई सफलता

आइसिसी यू–१९ विश्वकप क्रिकेट छनोट प्रतियोगिताको तयारीका लागि भारतमा रहेको नेपाली युवा टोलीले अभ्यास खेलमा फ्रेन्ड्स स्पोर्टस् एकेडेमीलाई १ सय २१ रनको फराकिलो अन्तरले पराजित गरेको छ ।
फ्रेन्ड्स एकेडेमीले टस जितेर फिल्डिङ रोजेपछि व्याटिङमा उत्रिएको नेपालले निर्धारित ४० ओभरमा ७ विकेट गुमाएर २ सय ५० रन बनाएको थियो । जावाफी व्याटिङ गरेको फ्रेन्ड्स एकेडेमी ३२ ओभरमा १ सय २९ रनमै अलआउट भएको हो । गौतम बुद्ध युनिभर्सिटी एकेडेमीको आउटफिल्ड चिसो भएका कारण खेल ४० ओभरमा छोट्याइएको थियो ।
अनिल साह र प्रनित थापामगरले अर्धशतक प्रहार गरेपछि नेपालको इनिङ मजबुत बनेको थियो । अनिल र प्रनितले पाचौँ  विकेटका लागि ८० रनको साझेदारी गरे । प्रनितले नेपालका लागि सर्वाधिक रन बटुल्ने क्रममा ८७ रन जोडे । त्यसक्रममा उनले ७ चौका र ३ छक्का प्रहार गरेका थिए । यस्तै, अनिलले आक्रामक ब्याटिङ गर्ने क्रममा ५० रनको योगदान दिए । ३४ बल सामना गरेका अनिलले २ चौका र ३ छक्का प्रहार गरे ।
आसारको अन्तिम साता सिंगापुरमा हुने छनोट प्रतियोगिताको तयारीका लागि नेपाली टोलीले अझै एक साता भारतमा प्रशिक्षण गर्नेछ । आगामी वर्ष न्युजिल्यान्डमा हुने यू–१९ विश्वकप प्रतियोगिताका लागि हुने एसिया छनोटमा नेपाल सहित अफगानिस्तान, मलेसिया र आयोजक सिंगापुरले प्रतिस्पर्धा गर्नेछन् । छनोटमा शीर्ष स्थान हात पार्ने एक टोलीले विश्वकप खेल्नेछ ।