काँग्रेसबाट मात्रै लोकतन्त्र संस्थागत र मुलुकको समृद्धि सम्भवः पराजुली

नेपाली काँग्रेस हेटौँडा उपमहानगर समितिका सभापति आनन्दराम पराजुलीले काँग्रेसबाट मात्रै लोकतन्त्र संस्थागत र मुलुकको समृद्धि सम्भव रहेको बताउनु भएको छ ।
नेपाल तरुण दल हेटौँडा ९ नंबर वडा समितिले शनिवार पशुपतिनगरमा गरेको कार्यकर्ता भेटघाट तथा चियापान कार्यक्रमको उद्घाटन गर्दै उहाँले आगामी प्रदेश र संघको निर्वाचनको तयारीमा लाग्न आफ्ना कार्यकर्तालाई आग्रह समेत गर्नुभएको छ । भातृ संगठनहरु बलियो भएमात्र पार्टी बलियो हुने पराजुलीको भनाइ थियो ।   
कार्यक्रममा उहाँले जनताको सुख दुखमा साथ दिन कार्यकर्तालाई निर्देशन दिँदै निर्वाचनमा जनताले दिएको मतको सम्मान गर्न समेत आग्रह गर्नुभयो ।
कार्यक्रममा काँग्रेस मकवानपुरका प्रवक्ता प्रदीप कोइराला, महासमिति सदस्य रीता खनाल, ट्रेड युनियन काँग्रेसका जिल्ला अध्यक्ष कुमार पौडेल, तरुण दलका नगर अध्यक्ष सुनिल गिरी, काँग्रेसका वडा उपसभापति विश्वराज नेपाल, रविलक्ष्मी श्रेष्ठ, सुशील सिग्देल लगायतकाले मन्तव्य व्यक्त गर्नु भएको थियो । । कार्यक्रम तरुण दलका वडा अध्यक्ष पूर्णबहादुर मगरको अध्यक्षतामा भएको हो ।