देशैभर वर्षा जारी, विशेषगरी १, ५ र ७ नम्बर प्रदेशका धेरै ठाउँमा वर्षा

मंगलबार बेलुकादेखि देशैभर वर्षा भइरहेको छ । बुधबार पनि देशका अधिकांश स्थानमा वर्षा भइरहेको जल तथा मौसम पूर्वानुमान महाशाखाले जनाएको छ । विशेषगरी १, ५ र ७ नम्बर प्रदेशका धेरै ठाउँमा वर्षा भइरहेको छ भने १ र ५ नम्बर प्रदेशमा बढी नै वर्षा भइरहेको महाशाखाले जनाएको छ ।
महाशाखाका अनुसार १ नम्बर प्रदेशमा ताप्जेजुङ, संखुवासभा बाहेकका जिल्लामा ठूलो वर्षा भइरहेको छ भने ५ नम्बर प्रदेशमा बाँके, बर्दिया बाहेकका ठाउँमा वर्षा जारी छ । ७ नम्बर प्रदेशमा भने डडेलधुरा, डोटी, अछाम लगायतका जिल्लामा वर्षा भइरहेको महाशाखाले जानकारी दिएको छ ।
दिउँसो मौसम एकैछिन खुलेपनि फेरि वर्षा हुने महाशाखाको अनुमान छ । गएको जेठ २९ गते पूर्वी नेपालबाट प्रवेश गरेको मनसुन मंगलबार बेलुकादेखि देशैभरि फैलिएको जल तथा मौसम पूर्वानुमान महाशाखाले जनाएको छ ।