हेटौडामा रहेको सामुदायिक तथा निजी विद्यालयको अनुगमन

नेपाल उपभोक्ता, महिला तथा बालबालिका संरक्षण समुहको पहलमा हेटौडामा रहेको सामुदायिक तथा निजी विद्यालयको चमेना गृह (क्यान्टिन) मा सोमबार अनुगमन गरिएको छ ।
हेटौडाको सिद्धार्थ मा.वि, बाल जागृती इग्ंिलस स्कुल र रिलायन्स स्कुलमा अनुगमन गरिएको हो । विद्यालयको क्यान्टिनको अवस्था, शौचालय, खानेपानी, सरसफाई लगायत विषयमा अनुगमन गरिएको थियो ।
अनुगमनको क्रममा हेटौडा २ मा रहेको सिद्धार्थ मा.विको क्याटिनबाट लेभल नभएको ४० पिस सुजीको पप जफत गरिएको छ । बिद्यालय भित्रै पानी पुरी चटपटे, जीवन लगायतका अखाद्य बस्तु समेत बिक्री गरेको पाइएको छ ।
त्यस्तै बाल जागृती इग्ंिलस स्कुलको क्यान्टिनमा सिधै हातैले झिकेर चाउमिन विक्री गरिरहेको भेटेपछि अनुगमन टोलीले सचेत गराएको छ ।
यद्यपी बाल जागृती इग्ंिलस स्कुलमा पिउने पानीको राम्रो व्यवस्था गरिएको पाइएको छ भने छात्राका लागि महिनाबारी हुदा आवश्यक पर्ने प्याड र प्याड फेर्नको लागि छुट्टै कोठाको व्यवस्था गरिएको पाइएको छ ।
यस्तै रिलायन्स स्कुलको क्याटिन अव्यवस्थित पाइएकोले व्यवस्थित गरेर संचालन गर्न अनुगमन टोलीले निर्देशन दिएको छ ।
जिल्ला शिक्षा कार्यालयका प्रतिनिधि, क्षेत्रिय खाद्य तथा गुण नियन्त्रण कार्यालयका प्रतिनिधि, खाद्य विशेषज्ञ, महिला तथा बालबाललिका कार्यालयका प्रतिनिधि, नेपाल उपभोक्ता महिला तथा बालबालिका संरक्षण समुह र संचारकर्मीको टोलिले संयूक्त रुपमा अनुगमन गरेको हो ।
यो पहिलो चरणको अनुगमनका क्रममा भेटिएका त्रुटिहरु सच्याइएको छ वा छैन पुनः अनुगमन गरीने र अन्य स्थानहरुमा पनि अनुगमनलाई निरन्तरता दिने नेपाल उपभोक्ता महिला तथा बालबालिका संरक्षण समुहकी अध्यक्ष सपना कंडेलले जानकारी दिनुभयो ।