३३ प्रतिशत महिला अधिकार जनयुद्ध र जनआन्दोलनको देन : कुमारी मोक्तान
अखिल नेपाल महिला संघ क्रान्तिकारी जिल्ला समन्वय समिति मकवानपुर लगायत नेकपा माओवादी केन्द्र निकट ४ वटा महिला संगठनको आयोजनामा १ सय १५ औं अन्तर्राष्ट्रिय श्रमिक महिला दिवस मनाइएको छ ।
नेकपा माओवादी केन्द्रकी केन्द्रिय सदस्य, बागमती प्रदेशकी पूर्व सामाजिक विकासमन्त्री एवम् प्रदेश सभा सदस्य कुमारी मोक्तानको प्रमुख आतिथ्यतामा शुभकामना आदानप्रदान कार्यक्रम गरिएको हो ।
कार्यक्रममा बोल्दै केन्द्रिय सदस्य मोक्तानले हरेक निकायमा ३३ प्रतिशत महिला सहभागिता सुनिश्चित हुनु २०५२ सालको जनयुद्ध र ६२–६३ को जनआन्दोलनको उपलब्धी भएको बताउनुभयो । इतिहासलाई फर्केर हेर्दा महिलामाथि विभेद उत्पीडन रहेको स्मरण गर्दै उहाँले अहिले प्राप्त अधिकार महिलाकै त्याग र बलिदानको देन भएको धारणा राख्नुभयो ।
नेकपा माओवादी केन्द्र मकवानपुर इन्चार्ज विजय गौतमले महिला मुक्ति विना समाजवाद सम्भव नभएको धारणा राख्नुभयो । पूँजीवादीहरुले उत्सवका रुपमा मात्रै नारी दिवस मनाउने गरेको टिप्पणी गर्दै उहाँले समाजवादीहरुले मनाउने नारी दिवस पृथक हुनुपर्ने बताउनुभयो । कार्यक्रममा माओवादी केन्द्रका नेताहरु रामनारायण विडारी, प्रल्हाद लामिछाने, सर्केश घलान, प्रमिला लामा, मानकुमारी नेपाली लक्ष्मी माझी लगायतको आतिथ्यता थियो । अखिल नेपाल महिला संघ क्रान्तिकारी जिल्ला अध्यक्ष लक्ष्मी पाख्रिनको अध्यक्षतामा कार्यक्रम भएको हो ।
