आठौं प्रदेश स्तरीय महिला उद्यमी प्रदर्शनीमा महिला उद्यमीका सफलताको कथा
हेटौंडामा जारी आठौं प्रदेश स्तरीय महिला उद्यमी प्रदर्शनीमा महिला उद्यमीहरुले आफ्नो सफलताको कथा प्रस्तुत गरेका छन् । शनिबार मकवानपुर उद्योग वाणिज्य संघको महिला उद्यमी विकास समितिकी सभापति अंकिता सुमार्गीको अध्यक्षतामा भएको कार्यक्रममा महिला उद्यमीहरुको सफलताको कथा प्रस्तुती गरिएको हो ।
कार्यक्रममा माउन्टेन बि कन्सन प्रालि ललितपुरकी संचालक सरिता भट्टराई, मान्द्रो नेपाल चितवनकी संचालक अम्बिका धिताल, सौगात गृह सिन्धुलीकी संचालक विमला थापा लगायतले आफ्नो व्यवसायीक यात्राको भोगाईहरु प्रस्तुत गर्नुभयो ।
आफ्नो सिपलाई कर्म बनाइ उद्योग संचालन गरेर धेरैलाई रोजगारी दिइरहनु भएका उहाँहरुले हामी कमजोर छौं भन्ने मानसिकता त्यागेमा सफल भइन्छ भन्ने थुप्रै उदाहरणहरु प्रस्तुत गर्नुभयो । रैथाने अन्नदेखि गुन्द्रुक मस्यौरा मह लगायतको व्यवसायमा आफुलाई अब्बल बनाएर अगाडी बढीरहनु भएका महिलाहरुले महिलामा लगानी मात्र होइन उच्च आत्मबलको आवस्यक्ता रहेको बताउनुभयो ।
११ वर्षपछि “पर्यटन, कृषि, लघु उद्यमशीलता–महिला सहभागिता आजको आवश्यक्ता” भन्ने नाराका शुक्रबारबाट सुरु भएको प्रदर्शनी चैत्र ६ गतेसम्म चल्नेछ ।
हेटौंडाको पल्पसा सदनमा जारी प्रदर्शनीमा मकवानपुर, सिन्धुली, चितवन, काठमाडौं, नुवाकोट, ईटहरी लगायतका जिल्लाका महिला उद्यमीहरुको हस्तकलाका उत्पादनहरु, अन्य वस्तु तथा सेवाहरुको प्रदर्शनी साथै कृषि सम्बन्धी स्टलहरु राखिएका छन् ।
शनिबारको कार्यक्रममा मकवानपुर उद्योग वाणिज्य संघका अध्यक्ष कृष्ण कुमार गुप्ता, वरिष्ठ उपाध्यक्ष, उपाध्यक्षहरु, पूर्व अध्यक्ष लगायतको उपस्थिती रहेको थियो ।
यो पनि पढ्नुहोस्
