साना दललाई पनि सरकारमा सामेल गराउन पहल थाल्नेः एमाले बागमती प्रदेश संसदीय दल
नेकपा एमालेले बागमती प्रदेशसभामा रहेका अन्य साना दललाई समेत सरकारमा सहभागी हुन पहल गर्ने भएको छ ।
सोमबार बसेको नेकपा एमाले बागमती प्रदेश संसदीय दलको बैठकले नयाँ राजनीतिक समीकरणमा सहभागी रहेका दल तथा अन्य साना दलहरुसँग सरकारमा सहभागिताको विषयमा छलफल अगाडि बढाउने निर्णय गरेको हो । बैठकमा सांसदहरुले सरकारमा सहभागी हुने विषयमा राय, सल्लाह र सुझाव राखेका थिए ।
संघीय गठबन्धन अनुसार प्रदेशमा हाल माओवादी केन्द्रका नेता शालिकराम जम्कट्टेल नेतृत्वको सरकार छ । केन्द्रीय गठबन्धन अनुसार माओवादी केन्द्र, नेकपा एमाले र नेकपा एकिकृत समाजवादी मिल्दा समेत प्रदेश सरकार गठन हुने अवस्था छैन । सदनमा २ मत रहेको हाम्रो नेपाली पार्टी अहिले निर्णायक देखिएको छ । त्यसकारण सरकारमा साना दललाई समेत सहभागी गराउने विषयमा छलफल अगाडि बढाउन लागिएको हो ।
११० सदस्यीय प्रदेशसभामा सरकार गठन गर्न ५६ मत आवश्यक पर्छ ।
प्रदेशसभामा नयाँ गठबन्धनमा आबद्ध एमालेका २७, माओवादी केन्द्र २१ र नेकपा एसको ७ गरी कुल ५५ मत रहेको छ । अब सरकार गठन गर्न १ मत आवश्यक छ । जसका कारण हाम्रो नेपाली पार्टीको समर्थन सरकारले जोगाइ राख्न कसरत गरिरहेको छ । प्रदेशसमा कांग्रेसको ३७, राप्रपाका १३, नेमकिपाका ३ र हाम्रो नेपाली पार्टीका २ सांसद छन् ।
यो पनि पढ्नुहोस्
