“एक से एक” सहकारी अभियन्ता पुस्तक विमोचन हुँदै
जिल्ला बचत तथा ऋण सहकारी संघ मकवानपुरले “एक से एक” सहकारी अभियन्ता पुस्तक विमोचन गर्दैछ ।
सहकारीले बिहिबार पत्रकार सम्मेलन गरी यहि फागुन २५ गते शुक्रबार अन्तराष्ट्रिय श्रमिक महिला दिवसको अवसर पारेर पुस्तक विमोचन गरिने जानकारी गराइएको हो ।
“एक से एक” सहकारी अभियन्ता नाम दिइएको पुस्तकमा सहकारीमा आबद्ध महिलाको भोगाई समेटिएको जिल्ला बचत तथा ऋण सहकारी संघकी अध्यक्ष कल्पना श्रेष्ठले जानकारी दिनुभयो । सहकारी अध्यक्ष, व्यवस्थापक र सहकारीकर्मी गरी ५० जनाको भोगाई तथा संघर्षलाई आत्मवृतान्त मार्फत् पुस्तकमा समेटिएको उहाँले बताउनुभयो ।
कार्यकुशलतामा सहकारीकर्मीहरु कोही कम नभएकाले विभेद नहोस् भनेर पुस्तकको नाम “एक से एक” राखिएको अध्यक्ष श्रेष्ठले बताउनुभयो । पाँच सय रुपैयाँ मुल्य राखिएको पुस्तकको बिक्रीबाट प्राप्त रकम कोषमा राखिने अध्यक्ष श्रेष्ठको भनाई छ ।
पुस्तक प्रकाशनका लागि प्रदेशको संस्कृति, पर्यटन तथा सहकारी मन्त्रालय, हेटौंडा उपमहानगरपालिका, ईन्द्रसरोवर गाउँपालिका, राष्ट्रिय वीमा संस्थान लगायत संघसंस्थाहरुको सहयोग रहेको संघले जनाएको छ । पत्रकार सम्मेलनमा अध्यक्ष श्रेष्ठ सहित उपाध्यक्ष मीना कुमारी चौरेल, सचिव वीरेन्द्र प्रसाद ढुङ्गाना, सहसचिव विजय बस्नेत, कोषाध्यक्ष विष्णुमाया लामा लगायतको उपस्थिती रहेको थियो ।
यो पनि पढ्नुहोस्
