भीमफेदी गाउँपालिकाका ४६ जना मोतीयाबिन्दुका बिरामीको निशुल्क अपरेशन
मकवानपुरको भीमफेदी गाउँपालिकाले ४६ जना मोतीयाबिन्दुका बिरामीको निशुल्क आँखाको अपरेशन गरिदिने भएको छ ।
भीमफेदीका २ स्थानमा संचालन गरिएको शिविरमा आँखा परिक्षण गराएका २५३ जना मध्ये ४६ जनामा मोतीयाबिन्दु देखा परेको थियो । हेटौंडा सामुदायिक आँखा अस्पतालसंगको समन्वयमा आइतबार उनिहरुको निशुल्क अपरेशन गरिने भीमफेदी गाउँपालिका अध्यक्ष हिदम लामाले जानकारी दिनुभयो ।
आँखाका बिरामी लिएर आफै अस्पताल पुग्नु भएका अध्यक्ष लामाले शनिबार पत्रकारहरुसंग कुरा गर्दै चालु आर्थिक वर्षको स्विकृत कार्यक्रम अन्तरगत आफ्ना नागरिकहरुको आँखा परिक्षण गरिएको बताउनुभयो ।
यसैबीच, हेटौंडा सामुदायिक आँखा अस्पताल व्यवस्थापन समितीका अध्यक्ष सिद्धिलाल श्रेष्ठले हेटौंडा सामुदायिक आँखा अस्पताललाई प्रदेशको उत्कृष्ट अस्पताल बनाउने लक्ष्य राखेको बताउनुभयो । बिरामीको संख्या बढ्दै गएको भन्दै उहाँले सेवासुविधाहरु थप गर्ने योजनामा रहेको बताउनुभयो ।
विभिन्न संघसंस्थाहरुसंग समन्वय गरी धेरै आँखा रोगाीहरुलाई सेवा गरिँदै आएको उहाँले बताउनुभयो । सुरुवाती चरणमा गाउँगाउँमा शिविर संचालन गरी सेवा दिएको हेटौंडा सामुदायिक आँखा अस्पताल १६ वर्षमा प्रवेश गरेको छ । अस्पतालमा अहिले हप्ताको ५ दिन अपरेशन हुने गरेको छ ।
यो पनि पढ्नुहोस्
