तीन नम्बर पुल नजिक भएको बस दुर्घटनामा मृत्यु हुनेको संख्या १६ पुग्यो
बाराको अमलेखगञ्ज स्थित तीन नम्बर पुल नजिक भएको बस दुर्घटनामा मृत्यु हुनेको संख्या १६ पुगेको छ । २० जना भन्दा बढी घाइते भएका छन् । केहीको अवस्था गम्भिर रहेको प्रहरीले जनाएको छ ।
घाइते भएकाहरूलाई हेटौंडा र चितवनका अस्पताल पुर्याएपछि डाक्टरहरूले मृत घोषणा गरेको जिल्ला प्रहरी कार्यालय मकवानपुरले जानकारी दिएको छ । १२ जनाको हेटौंडा अस्पतालमा, २ जनाको चुरेहिल अस्पतालमा, १ जनाको मकवानपुर सहकारी अस्पतालमा र अर्का १ जनाको चितवनको भरतपुर अस्पतालमा मृत्यु भएको प्रहरीले जनाएको छ ।
मृतक सबैको सनाखत हुन बाँकी छ । घाइतेहरूको चुरेहिल, हेटौंडा र सन्चो अस्पतालमा उपचार भइरहेको छ । गम्भिर घाइतेलाई भरतपुर अस्पताल रिफर गरिएको प्रहरीले जनाएको छ । नारायणगढबाट पथलैया जाँदै गरेको बा प्र ०६–००१ ख ०१० नम्बरको बस जितपुरसिमरा उपमहानगरपालिका २२ मा दुर्घटना भएको हो । बसमा ५१ जना यात्रु रहेका प्रहरीले बताएको छ ।
यो पनि पढ्नुहोस्
