चलचित्र प्रचारप्रसारका लागि प्रेम गीत ३ को एउटा युनिट हेटौंडामा
चलचित्रको प्रचारप्रसारको लागि प्रेम गीत ३ को एउटा युनिट हेटौंडा आएको छ । दशैको मुखमा रिलिज हुन लागेको चलचित्रको प्रमोशनका लागि गायक सहित कलाकारको टोली हेटौंडा आएका हुन् ।
प्रेमगीत ३ का कार्यकारी निर्माता चक्रबहादुर चन्द, वरिष्ठ कलाकार सुनिल थापा, नवनायक मनिष राउत, प्रेम पुरी र गायक प्रताप दासको टिम हेटौंडा आएको हो । असोज ७ गतेदेखि नेपाल र भारतमा प्रदर्शनमा आउन लागेको चलचित्रका कार्यकारी निर्माता चन्दले बताउनुभयो ।
उत्कृष्ट चलचित्र बनेको टिमले दाबी गरेको छ । नेपाल बाहेक १ हजार ७ सय स्क्रीनमा चलचित्र रिलिज हुन लागेको कलाकार सुनिल थापाले बताउनुभयो । माइनस २९ डिग्रीमा निकै कष्टका साथ सुटिङ गरिएको चलचित्र उत्कृष्ट बनेको थापाले बताउनुभयो ।
प्रेम गीत ३ नेपाली र हिन्दी दुबै भाषामा हेर्न सकिन्छ । आशुसेन फिल्मस्को ब्यानरमा निर्माण भएको चलचित्रमा प्रदिप खड्का, क्रिस्टिना गुरुङ, सन्तोष सेन लगायतका कलाकारको अभिनय रहेको छ । चलचित्रलाई सन्तोष सेन र छेतेन गुरुङले निर्देशन गरेका हुन् । चलचित्रका लेखक तथा निर्देशक छेतेनको निधन भइसकेको छ । चलचित्र पत्रकार संघ मकवानपुरका कार्यवाहक अध्यक्ष कपिल खड्काको सभाध्यक्षतामा कार्यक्रम भएको हो ।
यो पनि पढ्नुहोस्
