साफ महिला च्याम्पियनशिप: भुटानको इतिहासमै पहिलाे जित

काठमाण्डाैमा जारी छैटाैँ संस्करणको साफ महिला च्याम्पियनशिपमा शुक्रवार श्रीलङ्कामाथि पाँच–शून्यको सहज जित निकालेको भुटानले पहिलो पटक प्रतियोगिताको सेमिफाइनल पुग्ने सम्भावना बलियाे बनाएकाे छ ।

त्रिपुरेश्वरकाे दशरथ रङ्गशालामा श्रीलङ्कालाई हराउँदै भुटानले पहिलो पटक साफ च्याम्पियनशिपको अन्तिम चारमा पुग्ने सम्भावना बनाएको हो । भुटानले साफ महिला इतिहासमै पहिलाे जित निकालेकाे हाे ।यसअघि भुटानले बङ्गलादेशमा आयोजना भएको सन् २०१० को संस्करणमा श्रीलङ्कासँग एक–एक गोलको बराबरी खेलेको थियो । त्यसयता भुटानले साफ महिला च्याम्पियनशिपमा राम्रो नतिजा निकाल्न सकेको थिएन । सम्पन्न पाँच संस्करणका प्रतियोगितामा भुटान सबैभन्दा धेरै गोल खाने टोलीमा गनिँदै आएको छ भने भुटानले समूह चरणभन्दा माथिको यात्रा तय गर्न सकेको थिएन । तर शुक्रवारको नतिजाले भुटानको महिला टोलीले नयाँ उचाइ पाएकाे छ ।

भुटानको जितमा डेखी लाजोमले दुई गोल गर्दा न्याम्गेल डेमा, छिरिङ लाडेन र छिरिङ याङदेनले समान एक/एक गोल गरे ।

यसैबीच आयोजक नेपालले आउँदाे सोमवार श्रीलङ्कालाई पराजित गरे नेपाल समूह विजेताको रूपमा अन्तिम चारमा पुग्नेछ । श्रीलङ्काले नेपालसँग बराबरी खेल्दा पनि उसकाे यात्रा समूह चरणमा समाप्त हुनेछ । श्रीलङ्कालाई अघिल्लो चरण पुग्नका लागि नेपालसँगकाे खेलमा कम्तीमा पनि चार गोलकाे अन्तर हुनुपर्नेछ ।

समूह ‘बी’ अन्तर्गत आफ्नो दोस्रो खेलमा सुखद नतिजा निकालेको भुटान यसअघि पहिलो खेलमा नेपालसँग चार–शून्यले पराजित भएको थियो । समूह ‘बी’ मा भुटानले दुई खेलबाट तालिकामा तीन अङ्क जोडेको छ । भुटान शीर्ष स्थानमा उक्लिँदा एक खेल कम खेलेको नेपाल समान तीन अङ्कका साथ दोस्रो स्थानमा छ । तालिकाको पुछारमा रहेकाे श्रीलङ्का भने तालिकामा अङ्कविहीन छ ।

च्याम्पियनशिपमा भाेलि शनिवार दुई वटा खेल हुनेछ । दिनको पहिलो खेल १ बजे पाकिस्तान र बङ्गलादेशबीच हुनेछ भने बेलुका साढे ५ बजे दोस्रो खेलमा माल्दिभ्स र भारत प्रतिस्पर्धा गर्नेछन् ।