हेटौंडाका पशुपालक किसानलाई अनुदानः गाइ पालन, पाडापाडी, बंगुर, माछा, हास पालनमा प्रोत्साहन

हेटौंडा उपमहानगरपालिकाले चालु आर्थिक वर्षमा पशुपालक किसानलाई लक्षित गरेर बिभीन्न क्षेत्रमा अनुदान रकम उपलब्ध गराएको छ ।

चालु आर्थिक वर्षमा यहाँका किसानलाई पशुपालनमा सहयोग पुगोस भन्ने उदेस्यले सहयोग गरिएको हो । पशुपन्छी विकास तर्फ कृषकसंगको लागत साझेदारीमा साना किसान सहयोग कार्यक्रम अन्तर्गत ४० जना किसानलाई काउ म्याट वितरण गरिएको उपमहानगरपालिका आर्थिक विकास महासाखाका प्रमुख गंगा चौलागाईले बताउनुभयो ।

यसैगरी पाडा पाडी अनुदान १५ वटा समुहलाई ३ सय वटा वितरण गरिएको छ । युवा लक्षित अनुदान १० वटा फार्मलाई एक लाखका दरले वितरण गरिएको उहाँले बताउनुभयो । यसैगरी माछा तथा हाँस पालन अनुदान ९ वटा फार्मलाई वितरण गरिएको छ । बंगुर पालन अनुदान १७ वटा समुहलाई पाठापाठी वितरण, व्यवसायिक फर्म प्रोत्साहन कार्यक्रम १० गरी जम्मा १०१ जना किसानलाइ अनुदान उपलब्ध गराइएको उहाँले बताउनुभयो ।

विगत वर्षहरुदेखि संचालन हुँदै आएको पशुको कृतिम गर्भाधान कार्यक्रम अन्तर्गत चालु आर्थिक वर्षमा १२ हजार पशुमा सेवा उपलब्ध गराइएको छ । उपमहाँनगरका ४ वटा सेवा केन्द्रहरु मार्फत पशुमा लाग्ने विभिन्न रोगको लागि आवश्यक औषधीहरु निशुल्क वितरण गरिनुका साथै मौसम अनुसारको घाँसको वीउ सेवा केन्द्र मार्फत वितरण भइरहेको छ ।

पशुहरुमा आकस्मिक रुपमा लाग्ने खोरेत, पीपीआर, भ्याकुते रोगहरुको नियन्त्रणको लागि खोप लगाउने कार्य आवश्यकता अनुसार निरन्तर हुँदै आएको छ । संघीय सरकारको सशर्त अनुदान बापत उपलब्ध भएको मासु मिसन कार्यक्रम अन्तर्गत विभिन्न १३ कृषक समूहलाई १३० वटा पाडा वितरण कार्य सम्पन्न गरिएको छ । साथै मिटमार्ट निर्माण कार्यका लागि माछामासु व्यवसायी संघसंगको सहकार्यमा पशु बधशाला निर्माण कार्य चालु अवस्थामा रहेको छ ।