एसियाली खेलकुदका लागि दोस्रो चरणको खेलाडी छनोट जारी

छहारी संवाददाता

असार २७, २०७९

राष्ट्रिय खेलकुद परिषद (राखेप)ले आसन्न १९औं एसियाली खेलकुदका लागि छानिएका २३ खेलका दोस्रो चरणको खेलाडी छनोट गर्न थालेको छ ।

राखेपको हाइ पर्फमेन्स कमिटीको मापदण्ड र राष्ट्रिय टिम तयारी समितिको निर्देशनमा सम्बन्धित खेल संघहरुले नै खेलाडी छनोट गरिरहेका छन् । खेलाडी छनोटका लागि खेल संघहरुलाई २४ असारदेखि ३१ असारसम्मको समय दिइएको छ ।

चीनको ह्वाङझोउमा भदौ अन्तिममा हुने तय भएको एसियाली खेलकुद कोरोना महामारीका कारण आयोजक चीन र एसियन ओलम्पिक कमिटीले अनिश्चित समयका लागि स्थगित गरेका छन् ।

यो प्रतियोगिता सन् २०२३ को सुरुवातमा हुने अपेक्षा छ । एसियाली खेलकुद सर्दा नेपालले तयारीका लागि पर्याप्त समय पाएको छ । वैशाख ९ गते बसेको राखेप बोर्ड वैठकले एसियाली खेलकुदमा २३ खेल समावेश गर्ने निर्णय गरेको थियो । साभारः अनलाइन खबर ।