अन्तराष्ट्रिय मकवानपुर गोल्डकपः त्रिभुवन आर्मी र विजय युथ क्लबको फाइनल भिडन्त पक्का
विभागीय टोली त्रिभुवन आर्मी क्लब स्थानीय तह सहिद स्मृति अन्तराष्ट्रिय मकवानपुर गोल्डकप फुटबलको फाइनलमा प्रवेश गरेको छ ।
हेटौंडा–५ पिप्ले रंगशालामा आज भएको दोस्रो सेमिफाइनलमा अन्तराष्ट्रिय क्लब एभिनियर एफसी क्यामरुनलाई ११–१० गोल अन्तरले पराजित गर्दै आर्मीले फाइनल भिडन्त पक्का गरेको हो । निर्धारित समयको खेल १–१ गोलको बराबरीमा सकिएपछि खेल टाइब्रेकरमा गएको थियो ।
टाइब्रेकरमा ३–३ गोलको बराबरीपछि खेल सडनडेथमा लम्बिएको थियो । रोमाञ्चक र प्रतिस्पर्धात्मक बनेको सडन डेथमा आर्मीले क्यामरुनलाई ११–१० गोलले पराजित गर्दै फाइनलमा प्रवेश गरेको हो ।
आर्मीले उपाधीका लागि पर्सि ३० गते घरेलु टोली विजय युथ क्लब हेटौंडासंग प्रतिष्पर्धा गर्नेछ । विजय युथले शुक्रबार भएको खेलमा नेपाल पुलिसलाई ०-१ गोलले पराजित गर्दै फाईनलको यात्रा तय गरेको हो ।
प्रतियोगिताको विजेताले उपाधिसंगै १५ लाख रुपैयाँ नगद र उपविजेताले १० लाख रुपैयाँ प्राप्त गर्नेछन् । त्यस्तै व्यक्तिगत विधामा उत्कृष्ट हुनेलाई २५ हजार नगद र ट्रफी प्रदान गरिने छ । प्रतियोगितामा उत्कृष्ट हुने खेलाडीले बुलेट बाइक प्राप्त गर्नेछ । प्रतियोगितामा देशका शीर्ष क्लबसहित १२ टोलीको सहभागिता छ ।
यो पनि पढ्नुहोस्
