युवतीलाई बन्धक बनाई सामूहिक बलात्कार गरेको आरोपमा हेटौंडाका घलान पक्राउ
दुई महिनादेखि बन्धक बनाएर सामूहिक बलात्कार गरेको आरोपमा चितवन प्रहरीले हेटौंडाका एक जना पक्राउ गरेको छ ।
पूर्वी चितवनको राप्ती नगरपालिकामा २७ वर्षकी युवतीलाई बन्धक बनाई सामूहिक बलात्कार गरेको आरोपमा हेटौंडा–९ चौधघरेका ४५ वर्षका पूर्ण घलान पक्राउ परेको जिल्ला प्रहरी कार्यालय चितवनले जानकारी दिएको छ ।
घलानले राप्ती नगरपालिका–६ आदर्शटोलस्थित माछापोखरीमा रहेको आफू बस्ने घर (कटेरो)मा ती युवतीलाई बन्धक बनाएको प्रहरीले जनाएको छ । काठमाडौंमा ज्याला मजदुरी गर्ने पीडित युवती चैत १० गते भाउजुको घर पिप्ले आइरहेको बेला बसबाट राति भण्डारा बजारमा ओर्लिएपछि घलानले पिप्ले धेरै टाढा भएको र अर्को दिन बिहानै पुर्याई दिने भन्दै ललाईफकाई आफ्नो घरमा लगेका थिए ।
सोही दिन राती घलानले अन्य तीन जनालाई समेत बोलाएर सामूहिक बलात्कार गरेको पीडित युवतीकी भाउजुले दिएको जाहेरीमा उल्लेख छ। बन्धक बनाइएकी युवतीको स्वास्थ्यमा समस्या देखिएपछि घलानले स्थानीयको सहयोगमा अस्पताल पुर्याएका थिए । उपचार पश्चात युवतीलाई जेठ २० गते घलानले आफ्नो घरमा ल्याएर छोडेको उनकी भाउजुले बताएकी छन् ।
महिलाले जेठ २४ गते घलानविरुद्ध किटानी जाहेरी दिएपछि जबरजस्ती करणीको मुद्दा दर्ता गरी घलानलाई पक्राउ गरिएको प्रहरीले जनाएको छ । बलात्कारमा संलग्न तीन जनाको खोजी भइरहेको प्रहरीले जनाएको छ ।
यो पनि पढ्नुहोस्
