चर्च व्वाईज क्लब अन्तराष्ट्रिय मकवानपुर गोल्डकप फुटबलको क्वाटर फाइनलमा प्रवेश
चर्च व्वाईज क्लब काठमाडौं स्थानीय तह सहिद स्मृति अन्तराष्ट्रिय मकवानपुर गोल्डकप फुटबल प्रतियोगिताको क्वाटर फाइनलमा प्रवेश गरेको छ ।
हेटौंडा ५ मा रहेको पिप्ले क्याम्पा रंगशालामा जारी प्रतियोगितामा वि.एफ.सि. चितवनलाई ३–० गोलले हराउँदै चर्च व्वाईजले क्वाटर फाइनलमा स्थान सुरक्षित गरेको हो ।
चर्च व्वाईजका आशिष चौधरीले खेलको ४८ औं मिनेटमा गोल गर्दै खाता खोलेका थिए । दोश्रो हाफको तेश्रो मिनेटमै गोल खाएपछि दबाबमा परेको वि.एफ.सि. चितवनले खेलको ५७ औं मिनेटमा पुनः गोल खायो। चर्च व्वाईजका हेमन्त थापा मगरले गोल गर्दै टिमलाई २–० को अग्रता दिलाए ।
खेलको ७७ औं मिनेटमा चौधरीले पुनः तेस्रो तथा व्यक्तिगत दोस्रो गोल गरेपछि चर्च व्वाईजको जित पक्का भएको थियो । खेलको म्यान अफ द म्याच चर्च व्वाईजजका आशिष चौधरी घोषित भए ।
प्रतियोगितामा भोली शनिवार अपराह्न ४ नेपाल एपीएफ क्लब र फ्रेण्ड्स क्लव भिड्नेछन् । आगामी ३० गतेसम्म संचालन हुने प्रतियोगिताको विजेताले १५ लाख र उपविजेताले १० लाख रुपैयाँ प्राप्त गर्ने आयोजकले जनाएको छ । यस वर्ष पुस्कार राशी बढाइएको छ । अघिल्लो बर्ष विजेताले १० र उपविजेताले ५ लाख रुपैयाँ प्राप्त गरेका थिए ।
यस्तै प्रतियोगितामा सर्वोत्कृष्ट खेलाडीलाई बुलेट बाइक, विधागत उत्कृष्ट खेलाडीलाई नगद २५ हजार र हरेक खेलमा म्यान अफ दि म्याच हुने खेलाडीलाई नगद १० हजार प्रदान गरिने आयोजकले जनाएको छ।
यो पनि पढ्नुहोस्
