माओवादी केन्द्रको महाधिवेशनको सूचना सहज ढंगले दिन मिडिया सेन्टर स्थापना
नेकपा माओवादी केन्द्रको काठमाण्डौंमा जारी आठौं राष्ट्रिय महाधिवेशनको प्रचार तथा प्रकाशन विभागले मिडिया सेन्टर स्थापना गरेको छ ।
महाधिवेशन बारे आवश्यक सूचना र जानकारी दिने उदेश्यले अधिवेशन स्थल प्रज्ञा भवनमा नैं मिडिया सेन्टरको स्थापना गरिएको केन्द्रीय प्रचार तथा प्रकाशन विभाग सचिव गोविन्द आर्चायले जानकारी दिनुभयो । हरेक दिन साँझ नेकपा माओवादी केन्द्रका प्रचार विभाग प्रमुख कृष्णबहादु महराले मिडिया सेन्टर मार्फत महाधिवेशन बारे जानकारी दिने जनाइएको छ ।
मिडिया सेन्टरमार्फत सञ्चारकर्मीहरुलाई सहज रुपमा सूचना उपलब्ध हुने र मिडिया व्यवस्थापनमा सहज हुने प्रेस सेन्टर नेपालका अध्यक्ष बिष्णु सापकोटाले बताउनुभयो ।
महाधिवेशनको बन्द सत्र आज विहान साढे ११ बजेबाट सुरु भएको छ । बन्द सत्रमा पार्टी अध्यक्ष पुष्पकमल दाहाल प्रचण्डले वैचारिक एवम् राजनीतिक दस्तावेज प्रस्तुत गर्नु भएको छ । आजै स्थायी समिति सदस्य देव गुरुङले पनि विधान मस्यौदा प्रस्तुत गर्नु भएको छ । महाधिवेशन पुस १५ गतेसम्म चल्नेछ ।