एमालेको अवरोधपछि बागमती प्रदेशसभा बैठक अनिश्चित कालको लागि स्थगित
बिहिबार बसेको बागमती प्रदेशसभा बैठक पनि प्रमुख प्रतिपक्ष दल नेकपा एमालेको अवरोध पछि अनिश्चितकालको लागि स्थगित भएको छ ।
बैठकको सुरुमै एमालेका सांसदहरुले उठेर विरोध गरेपछि बैठक अघि बढ्न सकेन । सांसद केशव पाण्डेले संसदको हिजोको बैठकमा उठेका प्रश्नको चित्त बुझ्दो जवाफ नदिएसम्म संसद चल्न नसक्ने भन्दै विरोध गर्नु भएको थियो ।
बैठकमा सभामुख सानुकुमार श्रेष्ठले बिहिबार प्रदेश उच्च शिक्षा सम्बन्धमा व्यवस्था गर्न बनेको विधेयकको प्रतिवेदन, प्रदेश पर्यटन विकास सम्बन्धमा व्यवस्था गर्न बनेको विधेयक र केही प्रदेश ऐन संशोधन गर्न बनेको विधेयक पेश गर्ने कार्यसूचि रहेको जानकारी गराउनु भएको थियो ।
तर एमालेका सांसदहरुले मूख्यमन्त्री राजेन्द्र पाण्डेले संसदमा उठेका प्रश्नको जवाफ नदिएसम्म अवरोध जारी राख्ने बताएपछि सभामुख श्रेष्ठले अर्को सूचना नभएसम्मका लागि बैठक स्थगित भएको जानकारी गराउनुभएको हो ।