बागमती गाउँपालिकामा सामुदायिक आँखा अस्पताल केन्द्रको उद्घाटन
अर्जुन संजेलर बागमती गाउँपालिकामा सामुदायिक आँखा अस्पताल केन्द्रको उद्घाटन गरिएको छ ।
बागमती गाउँपालिका र हेटौंडा सामुदायिक आँखा अस्पतालको सहकार्यमा झुरझुरेमा सामुदायिक आँखा केन्द्र उद्घाटन गरिएको हो । गाउँपालिका अध्यक्ष सर्केश घलान र तिलगंगा आँखा प्रतिष्ठानका प्रमुख संचालन अधिकृत पिताम्बर अधिकारीले संयुक्त रुपमा शुक्रबार आँखा केन्द्र उद्घाटन गर्नु भएको हो ।
उद्घाटन कार्यक्रममा अध्यक्ष घलानले आँखाका बिरामीहरुलाई हेटौंडासम्म जानुपर्ने बाध्यता हटाउन घर आँगनमा नै सहज उपचार गर्न आँखा केन्द्र संचालनमा ल्याइएको बताउनुभयो । उहाँले समयानुसार केन्द्रको सेवा विस्तारमा सहयोग गर्दै जाने बताउनु भएको छ ।
नेपाल आँखा कार्यक्रमका कार्यकारिणी सदस्य सिद्धिलाल श्रेष्ठले बागमती गाउँपालिकामा हेटौंडा सामुदायिक आँखा अस्पताल स्थापना हुनपूर्वदेखि नै आँखा सेवा पुर्याउँदै आएकोमा अहिले व्यवस्थित रुपमा गर्न पाएकोमा खुशी व्यक्त गर्नु भयो ।
कार्यक्रममा बागमति गाउँपालिका उपाध्यक्ष धनमाँया स्याङतान, गाउँपालिकाका कार्यकारी अधिकृत दिलीप कुमार श्रेष्ठ, नेत्र रोग बिशेसज्ञ डा होम बहादुर गुरुङ, गाउँपालिकाका लेखा अधिकृत झम्क नारायण घलान, नेकपा माओवादी केन्द्र बागमती गाउँपालिका अध्यक्ष अरुण बल लगायतको उपस्थिती रहेको थियो।
यो पनि पढ्नुहोस्
