कांग्रेस बागमती प्रदेश सभापतिमा इन्द्रबहादुर बानियाँ निर्वाचित
नेपाली कांग्रेस बागमती प्रदेश सभापतिमा इन्द्रबहादुर बानियाँ निर्वाचित हुनु भएको छ ।
उहाँका निकटतम प्रतिस्पर्धी जगदिश्वर नरसिंह केसीलाई १५८ मतले पराजितले गर्दै बानियाँ प्रदेश सभापतिमा निर्वाचित हुनु भएको हो । कांग्रेस बागमती प्रदेश संसदीय दलका नेता एवं मकवानपुर सभापति बानियाँले आइतबार भएको दोस्रो चरणको निर्वाचनमा १०८५ मत प्राप्त गर्नुभयो भने केसीले ९२७ मत प्राप्त गर्नुभयो ।
बागमती प्रदेश सभापतिका लागि बानियाँ, केसी र भीमसेनदास प्रधान प्रतिस्पर्धामा हुनुहुन्थ्यो । शनिबार भएको पहिलो चरणको निर्वाचनमा सभापति पदका तीनै उम्मेदवारमध्ये कसैले पनि बहुमत अर्थात ५१ प्रतिशत मत नल्याएपछि आइतबार दोस्रो चरणको मतदान भएको हो ।
यसअघि आज बिहान सभापतिका अर्का उम्मेद्वार प्रधानले पत्रकार सम्मेलन गरी बानियाँलाई समर्थन गर्नु भएको थियो । आइतबार भएको मतदानमा हिजो भन्दा ५८ मत कम अर्थात २ हजार २५ मत खसेको थियो । जारी अधिवेशनमा २ हजार १ सय ५१ प्रतिनिधि रहेका छन् ।
बागमती प्रदेश सभापतिमा निर्वाचित बानियाँ २०४४ सालदेखि राजनीतिमा होमिनुभएको हो । उहाँ नेपाल विद्यार्थी संघ, तरुण दल, महाधिवेशन प्रतिनिधि, महासमिति सदस्यको समेत अनुभव हासिल गर्दै २०७३ सालमा कांग्रेस मकवानपुरका सभापति हुनु भएको थियो । उहाँ २०७० सालको संविधानसभा निर्वाचनमा संविधानसभा सदस्य विजय भएदेखि निरन्तर सांसद हुनुहुन्छ ।
बानियाँले २०७४ सालमा संस्कृति, पर्यटन तथा नागरिक उड्ययन राज्यमन्त्री र गृह राज्यमन्त्रीको जिम्मेवारी सम्हालिसक्नु भएको छ । २०७४ सालमा मकवानपुर संघीय क्षेत्र २ को ख बाट प्रत्यक्षतर्फ प्रदेशसभा सदस्य निर्वाचित भएपछि बानियाँले सर्वसम्मत रुपमा नेपाली कांग्रेस बागमती प्रदेश संसदीय दलका नेता चयन भई जिम्मेवारी सम्हालिरहनु भएको छ ।
यो पनि पढ्नुहोस्
