नेपाली कांग्रेस मकवानपुरको जिल्ला अधिवेशन पार्टीको केन्द्रीय महाधिवेशनपछि मात्र हुने
नेपाली कांग्रेस मकवानपुरको जिल्ला अधिवेशन पार्टीको केन्द्रीय महाधिवेशनपछि मात्र हुने भएको छ ।
हेटौंडामा बागमती प्रदेश अधिवेशन गर्नुपर्ने र त्यसअघि जिल्ला अधिवेशन सम्पन्न गर्न तयारी नपुग्ने भएकाले अधिवेशन सार्ने निर्णय गरिएको जिल्ला सभापति इन्द्रबहादुर बानियाँले जानकारी दिनुभयो । बुधबार हेटौंडामा पत्रकार सम्मेलन गरी उहाँले जिल्ला समितिका पदाधिकारी र सल्लाहकारसहितको बैठकले जिल्ला अधिवेशन केन्द्रीय महाधिवेशनपछि गर्न निर्वाचन अधिकृतसमक्ष अनुरोध गरेको जानकारी दिनुभयो ।
मंसिर ७ गते मात्रै प्रतिनिधिसभा क्षेत्रीय अधिवेशन गरिएको र बागमती प्रदेश अधिवेशन मंसिर १६ र १७ गते हेटौंडामा नै गर्नुपर्ने भएकाले जिल्ला अधिवेशन गर्न सम्भव नभएको निश्कर्ष निकालिएको सभापति बानियाँको भनाई छ । उहाँले बागमती प्रदेश अधिवेशनलाई व्यवस्थित रुपमा सम्पन्न गर्न सबै किसिमको तयारीमा जुटिसकेको बताउनुभयो ।
कांग्रेसको केन्द्रीय महाधिवेशन मंसिर २४, २५ र २६ गते हुँदैछ । मकवानपुरको दुई प्रतिनिधिसभा निर्वाचन क्षेत्रबाट ५२ जना महाधिवेशन प्रतिनिधि छनौट भएकोमा शेरबहादुर देउवा पक्षको ३७ जना, संस्थापन इतरबाट १४ जना छनौट भएका छन् ।
यो पनि पढ्नुहोस्
