मकवानपुर सहित तीन जिल्लामा ४३ हजार जनालाई कोरोना विरुद्धको खोप लगाईदै

मकवानपुर जिल्ला सहित तीन जिल्लाका ४३ हजार जना लक्षित समुहका नागरिकलाई कोरोना भाइरस बिरुद्धको खोप लगाइने भएको छ । सरकारले चीनबाट खरिद गरेर ल्याएको कोरोनाविरुद्धको खोप बागमती प्रदेशको राजधानी हेटौंडाबाट तीन जिल्लामा आज बितरण गरिने र नागरिकलाई खोप लगाइने भएको हो ।

मकवानपुर, चितवन र सिन्धुली जिल्लमा ४३ जनालाई दुइ डोजका दरले लगाउन मिल्नेगरी खोप ल्याइएको र बितरण गर्न लागिएको बागमती प्रदेशको सामाजिक बिकास मन्त्रालय अन्तरगतको स्वास्थ्य आपुर्ति व्यवस्थापन केन्द्रका प्रमुख बसन्त अधिकारीले जानकारी दिनुभयो ।

संघीय सरकारले पठाएको खोप पथलैयामा वाकिङ कुलर रुममा राखिएको उहाँले बताउनुभयो । खोप लगाउनका लागि सरकारले लक्षित समुह तोकेको छ । यसअघि प्रदेशका उपत्यका भन्दा बाहेकका जिल्लाका ४५ हजार जना नागरिकले भेरोसेल खोप लगाइसकेको अधिकारीले जानकारी दिनुभयो ।

चिसोमा राख्नका लागि हेटौंडामा ठाउँ अभाब भएपछी केन्द्रले पथलैयामा राखेको र आवस्यक्ता अनुसार प्रदेशका जिल्लाहरुमा बिवतरण गर्ने उहाँले बताउनुभयो ।

आएका खोपहरु यसअघि पनि बितरण गर्ने र स्थानीय तह मार्फत लगाइदै आएको छ । हाल सम्म बागमती प्रदेशमा ५ लाख ६० हजार ७८ जनाले खोप लगाइ सकेका छन् । चीनसँग खरिद गरिएको ४० लाख भेरोसेल खोपमध्ये शुक्रबार ८ लाख मात्रा ल्याइएको छ । बाँकी खोप साउन पहिलो सातासम्म ढुवानी गरिसक्ने सरकारको योजना छ ।

सरकारले आजदेखि ७७ वटै जिल्लामा कोरोना भाइरसविरुद्धको खोपको पहिलो मात्रा लगाउने भएको छ । चीनबाट आएको भेरोसेल र अमेरिकाबाट आएको जोन्सन एन्ड जोन्सनको खोप आजदेखि लगाइने स्वास्थ्य तथा जनसङ्ख्या मन्त्रालयले जनाएको छ ।

भेरोसेल र जोन्सन एन्ड जोन्सनको खोपका लागि लक्षित समूह छुट्याइएको छ । भेरोसेल ५५ वर्ष र माथिको उमेर समूहका सबै नागरिकलाई लगाइनेछ । यस्तै भेरोसेल विश्वविद्यालय, विद्यालयका प्राध्यापक, शिक्षक र कर्मचारीहरू, सार्वजनिक यातायातमा कार्यरत चालक र सहचालकलाई पनि लगाइने स्वास्थ्य सेवा विभागका महानिर्देशक डा। दीपेन्द्ररमण सिंहले जानकारी दिनुभयो ।

सरकारले तोकेका अत्यावश्यक सेवामा संलग्न खोप लगाउन बाँकी व्यक्तिहरू, खोप अनिवार्य गरेका देशमा जाने नेपाली नागरिकलाई पनि भेरोसेल लगाइनेछ । हिजो मात्रै नेपाल आइपुगेको १५ लाख जोन्सन एन्ड जोन्सन खोप ५० देखि ५४ वर्ष उमेर समूहका सबै नागरिक, पूर्ण र अति अशक्त अपाङ्गता भएका नागरिक र नेपालमा बसोबास गरिरहेका शरणार्थीलाई लगाइनेछ ।

जोनसन खोपको मात्रा एक पटक मात्र दिए पुग्छ । स्वास्थ्य संस्थामा कार्यरत स्वास्थ्यकर्मी तथा सरसफाइकर्मी र यसअघिको अभियानहरूमा खोप लगाउन छुट भएका सबै जनालाई खोप लगाउने विभागका महानिर्देशक डा सिंहले जानकारी दिनुभयो ।

खोप लगाउनका लागि नागरिकले उमेर खुल्ने आधिकारिक प्रमाण नागरिकता, पासपोर्ट, सवारी चालक प्रमाणपत्र, शैक्षिक प्रमाणपत्र र आवश्यक प्रमाणपत्र नभए वडाबाट उमेर प्रमाणित कागजात लिएर जानुपर्नेछ । अहिलेसम्म नेपालमा कुल जनसङ्ख्याको ८।८ प्रतिशत जनसङ्ख्या अर्थात् २६ लाख ११ हजार ८०७ जनाले पहिलो मात्रा र ३ दशमलव ५ प्रतिशत अर्थात् १० लाख ४१ हजार ३६६ जनाले दोस्रो मात्राको खोप लगाइसकेका छन् ।