सहिद स्मृति गोल्डकपको उद्घाटन खेलमा हेटौडा रिसोर्ट मकवानपुर ११, ४–१ गोल अन्तरले विजयी
स्थानीय तह सहिद स्मृति गोल्डकप फुटबलको उद्घाटन खेलमा रिगल हेटौडा रिसोर्ट मकवानपुर ११ विजयी भएको छ । हेटौडाको वनविज्ञान अध्यन संस्थानको खेल मैदानमा आजबाट सुरु भएको खेलमा मकवानपुर ११ ले नव जनजागृति युवा क्लब सिमरालाई ४–१ गोल अन्तरले पराजित गरेको हो ।
मकवानपुर ११ को जितका लागि जर्सी नम्बर १० का खेलाडी बिमल रानाले व्यक्तिगत २ गोल गरे । यस्तै जर्सी नम्बर ९ का रंजन विष्ट र जर्सी नम्बर ७ का अमिर श्रेष्ठले थप १र१ गोल गरे । नव जनजागृति युवा क्लब सिमराका लागि सान्त्वना गोल जर्सी नम्बर ९ का मोहित गुरुङगले गरेका हुन् ।
आजको म्यान अफ दि म्याच रिगल हेटौडा रिसोर्ट मकवानपुर ११ का लागि २ गोल गर्न सफल बिमल राना भएका छन् । प्रतियोगिताको औपचारिक उद्घाटन कलाकार सिताराम कट्टेल धुर्मुस गरेका हुन् ।
प्रतियोगिताको विजेता टीमले ट्रफिसहित नगद १० लाख प्राप्त गर्नेछ भने उपविजेता हुने टीमले ट्रफिसहित नगद ५ लाख प्राप्त गर्ने आयोजकले जनाएका छ । प्रतियोगितामा सर्वोत्कृष्ट खेलाडीले हेटौंडा स्कुल अफ म्यानेजम्यान्टले सौजन्यमा रोयल इन्फिल्ड बुलेट बाइक प्राप्त गर्नेछन् ।
त्यस्तै विधागत उत्कृट हुने खेलाडीले ट्रफिसहित नगद २५–२५ हजार प्राप्त गर्नेछन् । प्रतियोगिताका सर्वोउत्कृष्ट खेलाडीले नगद ट्रफिसहित नगद ५० हजार प्राप्त गर्नेछन् । प्रत्येक खेलमा एकजनालाई म्यान अफ दी म्याचबाट १० हजार पुरस्कार प्रदान गरिने आयोजकले जनाएको छ ।
प्रतियोगिता हेर्नका लागि ४ हजार दर्शक अट्ने फलामको प्याराफिटको निर्माण गरिएको छ । चैत्र ७ गतेसम्म चल्ने प्रतियोगिता हेर्न टिकटको व्यवस्था गरिएको छ । नकआउट चरणमा प्रतिव्यक्ति एस सय रुपैयाँ, सेमिफाइनलमा प्रतिटिकट २ सय रुपैयाँ र फाइनल खेल हेर्न ३ सय रुपैयाँ टिकट मूल्य तोकिएको आयोजकले जनाएको छ । प्रतियोगिताका लागि यसवर्ष जिल्लाका १० वटा स्थानीय निकायले सहयोग गरेका छन् ।
यो पनि पढ्नुहोस्
